भांगरभूंय | प्रतिनिधी
पणजी: अखील भारतीय कोंकणी परिशदेचो ह्या वर्साचो माधव मंजुनाथ शानभाग जिणेगौरव पुरस्कार पुंडलीक नायक हांकां फावो जाला. अखील भारतीय कोंकणी परिशद आपल्या स्थापणूक दिसाच्या सुवाळ्याक माधव मंजुनाथ शानभाग हांच्या नांवान पुराय भारतभर कोंकणीचो वावर केल्ल्याक जिणेगौरव पुरस्कार भेटयता.
साहित्यीक पुंडलीक नायक हांचें कोंकणी चळवळी खातीरचें योगदान पुराय भारतात आसा. तांणी केल्ल्या वावरा खातीर हो पुरस्कार तांकां भेटयतात अशें अखील भारतीय कोंकणी परिशदेन स्पश्ट केलां. हो निर्णय पुरस्कारा खातीर घडयिल्ले खासा समितीन घेतला.
अखील भारतीय कोंकणी परिशद ह्या वर्सा आपलो 88वो स्थापना दीस कर्नाटकांतल्या सागर वाठारांत मनयता. ह्या सुवाळ्याक मुखेल सोयरे म्हूण केंद्रीय साहित्य अकादेमी पुरस्कार फावो जाल्ले साहित्यकार शरतचंद्र शैणय हाजीर आसतले. मंगळूरचे कवी टायटस नोरोन्हा मानाचे सोयरे म्हूण हाजीर आसतले.
अखील भारतीय कोंकणी परिशद ज्या वाठारांनी कोंकणी लोक आसात थंय वचून कार्यावळी करून तांकां मुखेल प्रवाहांत हाडपाचो यत्न करता. हो सुवाळो घडोवन हाडूंक कॅथोलीक कोंकणी समाज, जीएसबी समाज, दैवज्ञ ब्राह्मण समाज, चोरोडी कोंकणी आचार समाज ह्या संघटणांनी आदार दिला.
ह्या सुवाळ्याक बरो प्रतिसाद मेळटलो आनी 500 वयर लोकांची उपस्थिती अपेक्षीत आसा अशें अखील भारतीय कोंकणी परिशदेची सहकार्यदर्शी स्नेहा सबनीस हांणी परिशदे वतीन उजवाडायिल्ल्या प्रसिद्धी पत्रकांत म्हणलां.
हे कार्यावळीक गोंयच्यान वचपाक परिशदेन बसीची वेवस्था केल्या. ते खातीर समाज माध्यमांचेर उलो मारिल्लो, तातूंत 70 जाणांनी 2000 रुपया प्रवास खर्च दिवन आपली नांव नोंदणी केल्यात. प्रतिनिधींची सागर रावपाची आनी जेवणाची वेवस्था परिशदेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
