भांगरभूंय | प्रतिनिधी
तुमी पीपीएफांत गुंतवणूक करतात जाल्यार ५ एप्रील ही तुमकां खूब म्हत्वाची तारीख. २०२४- २५ चें अर्थीक वर्स सुरू जालां. अशे परिस्थितींत ह्या अर्थीक वर्सा खातीर अर्थीक आनी कर नियोजन करपाचें आसल्यार तुमकां वेळ खूब म्हत्वाचो. कर वाटोवपा खातीर बाजारांत जायते पर्याय उपलब्ध आसले तरी पीपीएफ अजूनय सुरक्षीत गुंतवणूक म्हणून पळयतात. पीपीएफ ही एक येवजण जंय तुमकां कराची बचत करपा वांगडाच चड व्याजदराचो फायदो मेळटा. ५ एप्रील ही पीपीएफ येवजणेंतली खूब म्हत्वाची तारीख. ५ एप्रिलाची तारीख चुकल्यार तुमकां लाखांनी रुपयांचें लुकसाण जावपाक शकता. कशें तें पळोवया…
दर अर्थीक वर्साचे सुरवातेक ५ एप्रील मेरेन पीपीएफ येवजणेंत लमसम रक्कम गुंतवणूक केल्यार तुमकां सगळ्यांत चड व्याजदर मेळटलो. पीपीएफ खात्यांत दर म्हयन्याच्या ५ तारखेक व्याज मेजतात. अशे स्थितींत दर अर्थीक वर्साचे सुरवातेक ५ एप्रील मेरेन लमसम रक्कम जमा केल्यार तुमकां पुराय म्हयन्या खातीर व्याजाचो फायदो मेळटलो.
पीपीएफ खात्यांत जमा केल्ले रकमेचेर सरकार ७.१ टक्क्यांच्या दरान व्याज दिता. दर म्हयन्याचे ५ तारखे मेरेन मनशान गुंतवणूक केल्यार ताका जमा केल्ले रकमेचेर पुराय व्याजाचो फायदो मेळटा. तशेंच जर तुमी ५ तारखे उपरांत गुंतवणूक केल्यार तुमकां फकत ५ ते ३० तारखे मजगतीं सगळ्यांत उणे रकमेचेर लाव मेळटलो. अशें स्थितींत तुमकां त्या म्हयन्यांत व्याजाचें लुकसाण जावपाक शकता.
पीपीएफ कॅल्क्युलेटराच्या म्हणण्या प्रमाण ह्या अर्थीक वर्सा ५ एप्रील मेरेन लमसम रक्कमेंत १.५० लाख रुपया मेरेन गुंतवणूक केल्यार आनी ही गुंतवणूक १५ वर्सां चालू दवरल्यार १५ वर्सांत एकठांय केल्ले रकमेचेर व्याज म्हणून वट्ट १८.१८ लाख रुपया मेळटले. वांगडा दर म्हयन्याचे ५ तारखे उपरांत पीपीएफांत गुंतवणूक केल्यार फकत १७.९५ लाख रुपया व्याज मेळटले. अशे स्थितींत, तुमकां १५ वर्सानी २३,१८८ रुपयांचें व्याजाचें लुकसाण जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
