भांगरभूंय | प्रतिनिधी
पणजीः भौशीक बांदकाम खात्याच्या कामगार पुरवण संस्थेन 351 कामगारांचीं पदां जाहीर केल्यांत. हीं पदां पुराय दिसवड्या वेतनाचेर आसून उमेदवारांची निवड थेट मुलाखती वरवीं जातली, अशी कळोवणी भौशीक बांदकाम खात्यान जारी केल्या.
खात्यान जारी केल्ले कळोवणेंत वट्ट 351 पदां मदलीं 121 पदां कुशळ कामगार, अर्द-कुशळ 60 पदां आनी अकुशळ 170 पदां जाहीर जाल्यांत. कुशळ कामगारां खातीर दर दिसाचें वेतन रु. 671, अर्द-कुशळ कामगारां खातीर रु. 617 आनी अकुशळ कामगारां खातीर रु. 556 इतलें दर दिसाचें वेतन आसतलें.
कुशळ वर्गातल्या 121 पदां मदलीं 71 पदां काम सहाय्यक, 27 पदां इलेक्ट्रिशियन, 23 पदां प्लंबरा खातीर आसात. जाल्यार अर्द-कुशळ वर्गांत 60 पदां हीं पर्यवेक्षकाची आसात. जाल्यार अकुशळ वर्गांतल्या 170 पदां मदलीं 31 पदां हॅल्पर, 23 पदां स्विपर, 30 वॉचमॅन, 43 पदां दरेकी पंप अटेन्डट आनी प्यूना खातीर आसात.
ह्या पदां खातीर पिराय मर्यदा 45 वर्सा मेरेन आसा. 8 जून 2026 मेरेन इत्सुकांनी आल्तीन भौशीक बांदकाम खात्याचे मुखेल कचेरेंतल्या कामगार पुरवण संस्थेचे कचेरेंत उमेदवारी दाखल करची, अशें आवाहन खात्यान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
