भांगरभूंय | प्रतिनिधी
कायलीयन अॅम्बापेन केल्ल्या दोन गोलांच्या नेटार पीएसजीन बार्सेलोनाक 4-1 अशा गोल फरकांनी हारोवन चॅम्पियन्स लीग फुटबॉल सर्तीचे सेमी फायनलींत सुवात मेळयली.
पॅरिसांत जाल्ले पयल्या टप्प्यातले लडतींत पीएसजीक 2-3 अशा गोल फरकांनी हार घेवची पडिल्ली. पूण, बार्सेलोनांत जाल्ले दुसऱ्या टप्प्यांतले लडतींत ताणें 4-1 फरकान जैत जोडून 2021 उपरांत पयले खेपे चॅम्पियन्स लिगेचे सेमी फायनलींत सुवात मेळयली.
पीएसजी सेमी फायनलींत बोर्सिया ड्रॉटमण्ड क्लबा आड खेळटलो. ड्रॉटमण्ड क्लबान अॅटलेटिको माद्रिदाक 5-4 (सरासरी) असो हारयलो.
बार्सेलोना आडचे मॅचींत पीएसजीन आक्रमक सुरवात करून आपलो शेक मेळयलो. पूण, पयलो गोल करपाचो मान बार्सेलोनाक फावो जालो. लामिने यामल हाणें उजवे वटेच्यान आक्रमण केलें आनी नुनो मॅण्डेसा कडेन बॉल दिलो. ते उपरांत ताणें दिल्ल्या पासाचेर राफिन्हान उत्कृश्ट गोल केलो.
12व्या मिनटाकूच हो गोल स्विकारपाचो पडिल्ल्यान पीएसजीचें आव्हान वाडिल्लें. कारण सरासरीत बरोबरी सादपाक तांकां दोन गोलांची गरज आशिल्ली. तशेंच ही मॅच बार्सेलोनाच्या घरच्या मैदानाचेर आशिल्ल्यान प्रेक्षक बार्सेलोना वटेन आशिल्ले.
अशे उमळशीक वाडोवपी मॅचींत बार्सेलोनाचो डिफॅण्डर रोनाल्ड अरायोक रॅड कार्ड मेळ्ळें. ताका लागून बार्सेलोनाचेर फुडल्या 60 मिनटांच्या खेळांत 10 खेळगड्यांनी खेळपाची वेळ आयली. हे संदीचो फायदो ऑसमाने देम्बेलेन घेतलो आनी स यार्डा वयल्यान बॉल गोलपोस्टांत मारलो. ते उपरांत हाकिमीच्या पासाचेर वितन्हान गोल केलो. पीएसजीन 2-1 अशी आघाडी घेतली. तशेंच सरासरींत 4-4 अशी बरोबरी सादली.
ह्या गोलाक लागून आत्मविस्वास वाडिल्ल्या आनी सेमी फायनलींत सुवात मेळोवपाची संद निर्माण जाल्ल्यान पीएसजीच्या खेळाची धार आनीक खर जाली. अॅम्बापेन सगलीं सुत्रां आपल्या हातांत घेतलीं आनी 61व्या मिनटाक मैदानी गोल केल्या उपरांत 89व्या मिनटाक पॅनल्टी किकीचेर आपलो दुसरो गोल केलो.
सेमी फायनलीच्या पयल्या टप्प्यातल्यो मॅची 30 एप्रील आनी 1 मे दिसा जातल्यो. दुसऱ्या टप्प्यांतल्यो मॅची 7 आनी 8 मेक जातल्यो. कतार स्पोर्ट्स इन्व्हेंस्टमॅण्ट्सान 2011त पीएसजी क्लबाची मालकी घेतल्या उपरांत ह्या क्लबान लीग-1ची णव वस्तादपणां जोडल्यांत. पूण, चॅम्पियन्स लीग जिखपाचें सपन तांकां पुर्ण करपाक जमूंक ना. 2020त ताणें फायनलींत सुवात मेळयिल्ली. पूण, बायर्न म्युनिचान आड ताका हार घेवची पडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
