भांगरभूंय | प्रतिनिधी
एका वर्सांत प्रमाण वाडलें
पणजी: प्रधानमंत्री जनधन येवजणे खाला गोंयांत सुरू केल्ल्या वट्ट बँक खात्या पैकीं सुमार 14 टक्के खात्यांनी शुन्य रुपया रक्कम शिल्लक आसा. अशा खातेधारकांनी खंयचेय वेव्हार वा ट्रांजेक्शन केल्लें ना. फाटल्या एका वर्सांत अशा खात्यांची प्रमाण 1.15 टक्क्यांनी वाडल्या. खातेधारकांनी दिल्लो पत्तो बदलिल्लो आसप तशेंच तांचो मोबायल क्रमांक बंद आसप तशेंच हेर विवीध कारणांक लागून बँको अशा खातेधारकां कडेन संपर्क सादूंक शकनाशिल्ल्याचें स्पश्ट जालां.
मेळिल्ले म्हायती प्रमाण गोंयांत 31 मार्च 2025 अखेरेक वट्ट जनधन 2 लाख 16 हजार 116 बँक खातीं आशिल्लीं. हातूंतलीं 26 हजार 601 (12.30 टक्के) खात्यांन शुन्य रुपया शिल्लक आशिल्ले. 31 मार्च 2026 अखेरेक गोंयांत वट्ट 2 लाख 31 हजार 229 जनधन बँक खाती आशिल्लीं. हातूंतलीं 31 हजार 126 (13.47 टक्के) खात्यांत शुन्य रुपया आशिल्ले. अशीं खातीं मुखेलपणान स्थलांतरीत कामगारांची आसात. अशा कामगारांची येवजणे खाला खातीं जरी सुरू केल्लीं आसलीं तरी तातूंत कसलीच देवाण जाल्ली ना. ह्या खात्यांत कसलीच रक्कम लेगीत ना.
वयल्या एका वर्साच्या काळांत राज्यांतल्या जनधन खात्यांतली वट्ट रक्कम वाडल्या. 31 मार्च 2025 अखेरेक राज्यांतल्या जनधन खात्यांनी मेळून 192.27 कोटी रुपया निधी आशिल्लो. 31 मार्च 2026 अखेरेक ही रक्कम वाडून 234.75 कोटी रुपया इतली जाल्या. एका वर्सांत हे रकमेंत 22.10 टक्के वाड जाली. तशेंच आधार कार्डा कडेन संलग्न आशिल्ल्या खात्यांची संख्या 8 टक्क्यांनी वाडून 88.60 टक्के इतली जाली. 31 मार्च 2026 अखेरेक गोंयांतल्या 1 लाख 77 हजार 409 जनधन खात्यांची आधार सिडींग पुराय जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
