भांगरभूंय | प्रतिनिधी
मुंबय, खबरां संस्था : कर्मचारी निर्वाह निधी संघटणा म्हळ्यार ईपीएफओ (EPFO) आपल्या खातें धारकांक जिवन विमो दिता. ह्या विम्या खाला ईपीएफओ मेंबराक चडांत चड सात लाखांचो विमो मेळटा. ईपीएफओचे हे येवजणेक इम्प्लॉयज डिपॉझिट लिंक्ड इन्शुरन्स Employees Deposit Linked Insurance-EDLI) ह्या नांवान वळखतात. ही येवजण कितेंं? हातूंतल्यान ईपीएफओ खाते धारकांक कितें फायदो जाता हें जाणून घेवया.
EDLI येवजण म्हळ्यार कितें?
EPFO वतीन EDLI हे येवजणेची सुरवात १९७६ वर्सा केल्ली. ईपीएफओ वांगड्यांक कांय कारणांक लागून मरण आयिल्ल्यान ताच्या कुटुंबाक अर्थीक मजत जावचे खातीर ही येवजण चालू केल्ली. हो विमो ईपीएफओ कर्मचार्याक फुकट दितात. EDLI येवजणे खातीर कंपनी योगदान दिता.
विम्याची रक्कम कशी थारायतात?
विम्याची रक्कम थारावपा खातीर कांय सुत्रां पाळटात. विमो रक्कम फाटल्या बारा म्हयन्यांच्या मुळाव्या पगार आनी डीएच्या आदाराचेर थारायतात. ह्या विम्या खातीर दावो करपाचो आसल्यार दावो मुळाव्या पगाराच्या + निमाण्या पगारांतल्या डीएच्या ३५ पटींनी आसतलो. तशेंच दावेदाराक १,७५,००० रुपया मेरेन बोनस रक्कम मेळपाक शकता.
जो मेरेन नोकरी, तो मेरेन विमो
ईपीएफओ वांगडी जो मेरेन तो नोकरी करता तो मेरेनच ईडीएलआय येवजणे खाला विमो करतात. नोकरी गेल्या उपरांत ईपीएफओ वांगड्यांचे कुटुंबीय, उत्तराधिकारी, नॉमिनी ह्या विम्याचो क्लेम करपाक शकना. एकाद्रो एपीएफओ मेंबर सेगीत १२ म्हयने नोकरी करता जाल्यार ताच्या मरणा उपरांत नॉमिनीक उण्यात उणे २.५ लाख रुपया मेळपाक शकतात.
नॉमिनेशन नासल्यार कितें जातलें?
नोकरी करतना कर्मचार्यांचें दुयेंस, दुर्घटणा हाका लागून वा सैमीक मरण आयल्यार ईडीएलआय येवजणे खाला विम्याचे रकमे खातीर क्लेम करूं येता. ईडीएलआय येवजणे खाला ईपीएओ खातें धारकान नॉमिनी नोंद करूंक ना जाल्यार मरण आयिल्ल्या कर्मचार्याचा जोडीदार, लग्न जावंक नाशिल्ली धूव, नेण्टे पिरायेचीं मुरगीं हांका लावार्थी मानतात.
क्लेम कसो करचो?
ईपीएफओ खातें धारकाक अकाली मरण आयल्यार ताचो नामांकीत वा उत्तराधिकारी विमो केल्ली रक्कम दावो करूंक शकता. हे खातीर नामांकीत व्यक्तीची पिराय उण्यांत उणी १८ वर्सां आसूंक जाय. नामांकीत मनीस अल्पवयीन आसल्यार मागीर ताच्या आवय-बापायक ताचे खातीर दावो करूं येता. ताका मरण प्रमाणपत्र, उत्तराधिकार प्रमाणपत्र आनी हेर कागदपत्रां जाय पडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
