भांगरभूंय | प्रतिनिधी
नागरी पुरवण खात्याचें स्पश्टीकरण
पणजीः सरकारान आदारातीथ्य क्षेत्रांतल्या वेवसायिकां वांगडा कॅट केलां. हे आस्थापनां खातीर नागरी पुरवण खात्यान वेवसायीक सिलिंडरा खातीर अतिरीक्त २० टक्के वाडीव कोटा जाहीर केल्लो. मात दुसरे दिसा खात्यान एक सुचोवणी जारी करून हो अतिरीक्त कोटाचो लाव घेवपा खातीर पायप्ड नॅचरल गॅस (पीएनजी) जोडणी आस्थापनाक सक्तिची केल्या. मात पीएनजी सुविधा नाशिल्ल्या वाठारांतल्या आस्थापनांनी फुडाराक पीएनजी घेवपाचें हमीपत्र दिलें जाल्यार तें कोटाक पात्र थारतलें, अशें नागरी पुरवण खात्याच्या अधिकार्यान सांगलें.
बुधवारा नागरी पुरवण खात्यान वेवसायीक सिलिंडराचें कोटांत ६० टक्के वाड करपाचो आदेश दिल्लो. हातूंतलो २० टक्के कोटा उद्देगीक क्षेत्रा खातीर जाल्यार ४० टक्के कोटा हो आदारातिथ्य आस्थापनां खातीर वाटून घातिल्लो. ह्यान पयलीं उद्देगीक क्षेत्राक वेवसायिक सिलिंडराची पुरवण बंद आसली आनी आदारातिथ्य क्षेत्राक फक्त २० टक्के कोटा मर्यादीत आशिल्लो.
उपरांत खात्यान नवी सुचोवणी जारी करून सांगलें, सद्याची इंधन टंचाई पयस करपा खातीर मुख्यमंत्री प्रमोद सावंत हांणी मान्यताय दिल्या. उपरांत राज्य सरकारान तात्काळ २० टक्के वाढीव कोटाची घोशणा केल्या. पुण राज्यांतल्या वेवसायीक आस्थापनांनी जर पीएनजी जोडणी घेतली जाल्यारच तांकां ४० टक्के मेरेन अतिरिक्त गॅस सिलिंडर एलपीजी कोटा मेळटलो. हाचो लाव हॉटेलां, खाणावळी, बेकरी, कॅन्टीन, हॉस्पिटलां, हॉस्टेलां, अन्न प्रक्रिया युनिट्स आनी सामुदायीक रांदचे कुडींक मेळटलो.
हातूंत सरकारान एक थाकाय जाहीर केल्या. हो वाडीव कोटा घेतलो जाल्यार वेवसायीकांक सक्रीय पीेएनजी जोडणी वा अस्तिवात आशिल्ले पायपलानीची सुविधा गरजेची ना. एकदां पीएनजीचें जाळें तयार जाले उपरांत पीएनजी सुविधे खातीर वळपा खातीर आमी तयार आसात अशे हमीपत्र अर्जा सयत सादर केले उपरांत हीं आस्थापनां पात्र थारपाक शकतात, अशें अधिकार्यान सांगलें.
हो निर्णय वेवसायिकांक बेगीनात बेगीन आदार दिवपा खातीर आनी तांकां ल्हव ल्हव पीनएजीकडे घुंवडावपा खातीर घेतला. वेवसायिकांनी पीएनजी जोडणी खातीर अर्ज करतना आपल्या वेवसायाची म्हायती जशी जीएसटी नोंदणी आनी लागपी गॅसाचो अदमास सादर करचो. उपरांत ताच्या रोलावट प्रक्रियेचो भाग म्हणून तांचे सुवातेची जागेची तपासणी जातली, अशी म्हायती अधिकार्यान दिली.
उत्तर गोंयां खातीर, ’गोवा नॅचरल गॅस प्रायव्हेट लिमिटेड’ कडे अर्ज करचो जाल्यार दक्षीण गोंयच्या आस्थापनांनी ’इंडियन ऑईल अदानी गॅस प्रायव्हेट लिमिटेड’ हांचे कडेन अर्ज करचो. हो वाढीव कोटा मर्यादीत काळा खातीर आशिल्ल्यान, सरकारान सगळ्या वेवसायीक एलपीजी वापरप्यांक रोखडेंच अर्ज करपाचें आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
