भांगरभूंय | प्रतिनिधी
नागरी पुरवण खात्याचें स्पश्टीकरण
भांगरभूंय । प्रतिनिधी
पणजी : सरकारान सरबराय क्षेत्रांतल्या वेवसायिकांक ‘कॅट’ केलां. ह्या आस्थापनां खातीर नागरी पुरवण खात्यान वेवसायीक सिलिंडरा खातीर अतिरिक्त 20 टक्के वाडीव कोटा जाहीर केल्लो, पूण दुसऱ्या दिसा खात्यान एक सुचोवणी जारी करून ह्या अतिरिक्त कोटाचो लाव घेवपा खातीर पायप्ड नॅचरल गॅस (पीएनजी) जोडणी आस्थापनाक सक्तीची केल्या. पीएनजी सुविधा नाशिल्ल्या वाठारांतल्या आस्थापनांनी फुडाराक पीएनजी घेवपाचें हमीपत्र दिलें जाल्यार ते कोटाक पात्र थारतले, अशें नागरी पुरवण खात्याच्या अधिकाऱ्यान सांगलें.
बुधवारा नागरी पुरवण खात्यान वेवसायीक सिलिंडराच्या कोट्यांत 60 टक्के वाड करपाचो आदेश दिल्लो. हातूंतलो 20 टक्के कोटा उद्देगीक क्षेत्रा खातीर जाल्यार 40 टक्के कोटा हो सरबराय आस्थापनां खातीर वांटून घातिल्लो. हाचे आदीं उद्देगीक क्षेत्राक वेवसायीक सिलिंडरांची पुरवण बंद आसली आनी सरबराय क्षेत्राक फक्त 20 टक्के कोटा मर्यादीत आशिल्लो.
उपरांत खात्यान नवी सुचोवणी जारी करून सांगलें, सध्याचो इंधन उणाव पयस करपा खातीर मुख्यमंत्री डॉ. प्रमोद सावंत हांणी मान्यताय दिल्या उपरांत राज्य सरकारान तत्काळ 20 टक्के वाडीव कोटाची घोशणा केल्या. पूण गोंयांतल्या वेवसायीक आस्थापनांनी जर पीएनजी जोडणी घेतल्या जाल्यारूच तांकां 40 टक्के मेरेन अतिरिक्त गॅस सिलिंडर एलपीजी कोटा मेळटलो. हाचो लाव हॉटेलां, खाणावळी, बेकरी, कॅन्टीन, हॉस्पिटलां, हॉस्टेलां, अन्न प्रक्रिया युनिट्स आनी सामुदायीक रांदचे कुडींक मेळटलो.
हातूंत सरकारान एक थाकाय जाहीर केल्या. जर पीएनजी पायपलायनीची सुविधा ना जाल्यार आस्थापनांक हो वाडीव कोटा घेवपाक मेळटलो, पूण एकदां पीएनजीचें जाळें तयार जाले उपरांत पीएनजी सुविधा घेवपाक आमी तयार आसात अशें हमीपत्र अर्जा सयत सादर करचें पडटलें. ते उपरांतूच ह्या वाडीव कोटा खातीर आस्थापना पात्र थारपाक शकतात, अशें अधिकाऱ्यान सांगले.
हो निर्णय वेवसायिकांक ताकतिकेन आदार दिवपा खातीर आनी तांकां ल्हवू ल्हवू पीनएजी कडेन ओडपा खातीर घेतला. वेवसायिकांनी पीएनजी जोडणें खातीर अर्ज करतना आपल्या वेवसायाची म्हायती, देखीक जीएसटी नोंदणी आनी लागपी गॅसाचो अदमास सादर करचो. उपरांत ताचे रोलआवट प्रक्रियेचो भाग म्हणून तांचे सुवातेची तपासणी जातली, अशी म्हायती अधिकाऱ्यान दिली. उत्तर गोंया खातीर, ‘गोवा नॅचरल गॅस प्रायव्हेट लिमिटेड’ कडेन अर्ज करचो जाल्यार दक्षीण गोंयच्या आस्थापनांनी ‘इंडियन ऑयल– अदानी गॅस प्रायव्हेट लिमिटेड’ हांचे कडेन अर्ज करचो. हो वाडीव कोटा मर्यादीत काळा खातीर आशिल्ल्यान, सरकारान सगल्या वेवसायीक एलपीजी वापरप्यांक रोखडेच अर्ज करपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
