भांगरभूंय | प्रतिनिधी
पर्यावरण भौशीक जनसुनावणेंत लोकांचो विरोध; खर आंदोलनाची शिटकावणी
भांगरभूंय । प्रतिनिधी
वाळपय: पिसुर्ल्यां चलपी अंबे मेटालिक्स स्पाँज आयन प्लांटाक लागून व्हड प्रमाणां प्रदुशण जाता. ह्या प्रकल्पाच्या प्रदुशणाक लागून सरभोंवतणच्या लोकांक फाटल्या 20 वर्सां सावन भलायकेच्यो समस्या उप्रासल्यात. पियेवपाच्या उदकाचो उणाव जालाच, ते भायर सैमीक स्त्रोत नश्ट जाल्यात. हाका लागून फुडारांत ह्या प्रकल्पाच्या विस्ताराक पर्यावरण दाखलो दिलो जाल्यार ह्या वाठारांत आनीक गंभीर समस्या निर्माण जावपाक शकतात. हे खातीर खंयचेच स्थितींत ह्या प्रकल्पाच्या विस्ताराक पर्यावरण दाखलो दिवचो न्हय, अशी नेटाची मागणी थळाव्या लोकांनी केल्या.
गोंय प्रदुशण नियंत्रण मंडळा वतीन पिसुर्लें पंचायतीच्या सभाघरांत हे संबंदांत जनहीत चांचणी घेतली. ह्या वेळार हाजीर आशिल्ल्या लोकांनी ताका खर विरोध केलो. लोकांच्या विरोधा कडेन गोंय प्रदुशण म्हामंडळान ह्या प्रकल्पाक पर्यावरण दाखलो दिलो जाल्यार ताचे आड खर आंदोलन करतले, अशी शिटकावणी ह्या वेळार दिली.
सत्तरी म्हालाचे उपजिल्होधिकारी प्रवीण परब हांच्या मार्गदर्शना खाला पर्यावरण सुनावणी घेतली. ह्या वेळार प्रदुशण नियंत्रण मंडळाचे सहाय्यक अधिकारी रोहन नागवेंकार, कंपनीचे प्रतिनिधी, पिसुर्लेचे सरपंच देवानंद परब, होंडाचे सरपंच शिवदास वाडकार, थळाव्या वाठारांतले समाजीक वावुरपी, कोळसो विरोधी आंदोलनाचे प्रतिनिधी, पर्यावरण मोगी आनी शेतकार व्हड प्रमाणांत हाजीर आशिल्ले.
वीस वर्सां आदीं पिसुर्लें उद्देगीक वसणुकेंत अंबे मेटालीक प्लांट प्रकल्प उबारिल्लो. त्या प्रकल्पांतल्यान व्हड प्रमाणांत प्रदुशण जाता. प्रदुशण नियंत्रणा खातीर मार्गदर्शक तत्वांची अंमलबजावणी करिनात. ताका लागून ह्या प्रदुशणाचो पिसुर्लें, कुमारखण, होंडा, भुंयपाल, सालेली, हरवळे अशा गांवांक त्रास जाता. ह्या प्रकल्पांतल्यान भायर सरपी पिठो सरभोंवतणच्या गांवांनी पातळटा. ताका लागून त्या वाठारांतले सैमीक स्त्रोत नश्ट जाल्यात. तशेंच ह्या वाठारांतल्यो काजी, माड, माडयो, केळमे, भात शेती नश्ट जाल्यात. हे संबंदांतल्यो साबार खेपे कागाळी केल्यात. मात कंपनीचें वेवस्थापन आनी गोंय प्रदुशण नियंत्रण मंडळाचे अधिकारी कागाळेची दखल घेनात, असो आरोप ह्या वेळार केलो.
समाज वावुरपी आनी पिसुर्लें शेतकार संघटणेचे अध्यक्ष हनुमंत परब हांणी सांगलें, हो प्रकल्प ह्या वाठारांतल्या लोकांचे भलायकेक आनी कृशी बागायतीक मारक आसा. ह्या प्रकल्पाक लागून ह्या वाठारांतल्यो न्हंयो, बांयो प्रदुशीत जाल्यात. हे संबंदांत खूब खेपे प्रदुशण म्हामंडळांत कागाळी केल्यात, मात ताची दखल घेवंक ना. सध्या अस्तित्वां आशिल्ल्या प्रकल्पा संबंदान वेवस्थापनान हे सुनावणे वेळार फटीची म्हायती दिल्या, असोय आरोप ह्या वेळार केलो.
ह्या प्रकल्पा पासून कांय अंतराचेर म्हादय अभयारण्य वाठार आसा. तशेंच गांवांतल्या पुरातन शिवलिंगाकूय धोको निर्माण जाला. रोजगाराचे बाबतींत थळाव्यांक प्राधान्य दिवपाक कंपनीचें वेवस्थापन अपेशी थारलां. आतां मेरेन हे कंपनीन थळाव्यांक कसलेच तरेची सुविधा दिवंक ना. फुडारांत ह्या प्रकल्पाचो विस्तार जालो जाल्यार ह्या वाठारांतलें प्रदुशण तेंगशेर पावतलें आनी लोकांक थंय रावप कुस्तार जातलें, अशेंय परब हांणी सांगलें.
अंबे कंपनीचे मुळावे मागणेक दिल्ली परवानगी म्हणल्यार भानगड आसूं येता. जांणी ह्या प्रकल्पाक प्रथमदर्शी मान्यताय दिल्या ताची सरकारान चवकशी करची आनी कारवाय करची, अशी मागणी समाजीक वावुरपी अभिजीत प्रभुदेसाय हांणी केली.
समाज वावुरपी बी. डी. मोटे हांणी सांगलें, ह्या प्रकल्पाक लागून धनगर भावांच्या दूद वेवसायाचेर वायट परिणाम जाला. ताका लागून ह्या कुटुंबां मुखार अर्थीक समस्या निर्माण जाल्यात, तरणाट्यांक दम्याचें दुयेंस जालां. फुडारांत हे कंपनीन ह्या वाठारांतल्या लोकांक भलायकी सुविधा मेळोवन दिवची.
सुभाष देसाय, वासुदेव परब, सत्यवान परब, साईदत्त परब, मिलिंद परब, पांडुरंग परब, एड. गणपत गांवकार, शैलेश शेटगांवकार, विठू परब, अमर परब, विलास परब आनी हेरांनी चर्चेंत वांटो घेवन, प्रकल्पाच्या विस्ताराक खर विरोध केलो.
सुरवेक उपजिल्होधिकारी प्रवीण परब हांणी सुनावणे संबंदांतली खोलायेन म्हायती दिली. तशेंच फुडारांत ह्या प्रकल्पाचो विस्तार जालो जाल्यार मार्गदर्शक तत्वांची अंमलबजावणी हे संबंदांत व्हिडीयो टेपी वरवीं म्हायती दिली.
‘अंबे’चें स्थलांतरूच योग्यः पिसुर्लें सरपंच
अंबा मेटेलीक प्लांटाच्या विस्ताराक विरोध करतना गरज पडली जाल्यार पदाचो त्याग करपाची तयारी आसा. सध्या चलपी ह्या प्रकल्पा संबंदांत गोंय प्रदुशण नियंत्रण मंडळान सर्वेक्षण करचें. ह्या वेळार थळावी पंचायत आनी लोकांक विस्वासांत घेवचे. ह्या प्रकल्पाक लागून थळाव्या लोकांक कसलोच फायदो ना. ताका लागून हो प्रकल्प हेर सुवातेचेर स्थलांतरीत करपूच योग्य जातलें, अशें पिसुर्लेंचे सरपंच देवानंद परब हांणी सांगलें.
कंपनी विस्वासघातकीः होंडा सरपंच
कंपनी विस्वासघातकीः होंडा सरपंच हे जनसुनावणे संबंदांतली वेवस्थीत म्हायती थळाव्यांक मेळूंक ना. ताका लागून ही सुनावणी बेकायदो आसा. ह्या प्रकल्पाक लागून पिसुर्लें आनी होंडा वाठारांतल्या परंपरीक दूद ववसायाचेर वायट परिणाम जाला. ही कंपनी विस्वासघातकी. ताका लागून हे कंपनीचेर कोणेच विस्वास दवरचो न्हय. हे कंपनीच्या विस्ताराक सरकारान मान्यताय दिवची न्हय, अशी मागणी होंडाचे सरपंच शिवदास माडकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
