भांगरभूंय | प्रतिनिधी
म्हापशें, प्रतिनिधी ः पिळर्ण- पर्वरेंतल्या ऑडिट भवना लागसार 20 ते 25 वर्सां पिरायेच्या तरणाट्याची कूड दुबावीत स्थितीत मेळ्ळी. उल्लेख केल्ले अज्ञात कुडीचेर बुधवारा पोस्टमॉर्टम करतले. उपरांत मरणाचें कारण स्पश्ट जातलें.
चड म्हायती प्रमाण, आयज मंगळारा फातोंडेर सुमार 2 वरांचेर गस्त घालतना पीसीआर रॉबर्ट गाडयेंतल्या पुलिसांक ऑडिट भवना लागसार ही कूड मेळ्ळी. उपरांत पुलिसांनी हे घडणुकेची म्हायती पर्वरी पुलिसांक दिली. पुलीस निरिक्षक जितेंद्र नायक हांच्या फुडारपणा खाला पंचनामो करून कूड पोस्टमॉर्टम खातीर जीएमसीत धाडली. कुडीचेर कांय घांवे आसात. हे घांवे खून करपाचो यत्न करतना मारपेट केल्ले खातीर जाल्यात काय हें प्रकरण हीट अँड रन हें अजून स्पश्ट जावंक ना. देखून फाल्यां बुधवारा जीएमसीत कुडीचो पोस्टमॉर्टम करतले.
मजगतीं, ह्या मनशाचें वळखपत्र मेळूंक ना. पर्वरी आनी भोंवतणच्या वाठारांतल्या पुलीस स्टेशनांनी दनपारां मेरेन बेपत्ता जाल्ल्याची कागाळ लेगीत येवंक ना. देखून पुलिसांनी मेल्ल्या मनशाची वळख पटोवपाचो यत्न सुरू केला.
पर्वरी पुलिसांनी हे प्रकरण असैमिक मरण म्हणून नोंद केला. पुलीस उपअधीक्षक विश्वेश कर्पे, निरिक्षक जितेंद्र नायक आनी वरिश्ठ अधिकाऱ्यांच्या फुडारपणा खाला फुडलो तपास सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
