भांगरभूंय | प्रतिनिधी
म्हापशें, प्रतिनिधी ः सायपे, मार्रा- पिळर्णा 10 वर्सां पिरायेच्या शाळेंतल्या चलयेचो विनयभंग केल्ल्या प्रकरणांत दुबावित जालम रामदयाळ महोर (52, मध्य प्रदेश) ह्या सुरक्षा रक्षकाक पर्वरे पुलिसांनी अटक केली. पिडेस्त चली ही दुबावित काम करतालो त्या व्हिलाच्या केअरटेकरची धूव आसा.
ही घडणूक बुधवारा 4 तारखेक रातच्या 9 वरांचे सुमाराक घडली. दुबावितान पिडेस्त चलयेक आपल्या कडेन आपयले आनी तिचो विनयभंग केलो. हो प्रकार चलयेन बिरेस्तारा आपल्या आवय-बापायक सांगलो.
ते उपरांत चलयेच्या आवयन दनपारां पुलिशेंत कागाळ केली. हे कागाळीचेर आदारून पुलिसांनी दुबाविताक अटक केली. भारतीय दंड संहितेच्या कलम 74 आनी 75, पोक्सो कायदो कलम 8 आनी 12 आनी गोंय किशोर कायद्याच्या कलम 8 खाला पुलिसांनी दुबाविताचेर गुन्यांव नोंद केला.
म्हापश्यां न्यायालयान दुबाविताक 14 दिसांची न्यायालयीन कोठडी दिल्या. पुलीस निरिक्षक राहुल परब हांच्या फुडारपणा खाला उपनिरिक्षक लॉरीन सिक्वेरा फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
