पावस : सुंदर रुपांचो ऋतू

भांगरभूंय | प्रतिनिधी

कुड्डूक, तायखिळो, आळूं, लुतीची भाजी ह्या दिसांनी तकली वयर काडटात. त्यो रुचीक आनी पुश्टीक आसतात, देखून त्यो खावप भलायके खातीर बरें.

निळ्या निळ्या मळबांत काळ्या, निळ्या कुपांची दाटी जाता. गडगडाटाचो बुलंद आवाज करीत पावसाचें आगमन जाता. सैमाच्या चारूय वाटांनी थंड वाऱ्याची झुळूक जाणवता. झाडां- पेडां, माड, मनीस, तशेंच सुकणीं- सावदां पावसांत न्हातात. राना- वनांत मोर पिसारे फुलोवन नाचपाक लागतात. वसंतांत कुचकुचीत पानांनी फुलिल्लीं झाडां, वेली, झोपां पावसाच्या थेंब्यांनी ओलिचिंब न्हातात. पाना-फुलांचें सौंदर्य फुलून दिसता. वचत थंय पाचवे गालिचे नदरेंत पडटात. पाचवे बुटे दिसतात. जणू धरणी माता पाचवी शाल नेसून शांत न्हिदल्या. अश्या वातावरणांत पावसाचे सोबतीन सगळें चैतन्यमय जाता. लोक रिमझिम पावसांत न्हातात, तर तरणाटीं हातात हात घालून ‘बरसो रे मेघा बरसो’ हें पद गुणगुणांत फिरतात.
पावस आपलीं तरेकवार रुपां दाखयता. शिरी शिरी पावस, घोंग्याचो पावस, पिरीपिरी पावस- वत आनी रिमझिम पावस अशे पावसाचे मनोहारी खेळ. दोन दीस रागार फुगार जावन लिपून बशिल्लो पावस. अशीं हीं पावसाचीं सुंदर रूपां तीन म्हयन्यांच्या काळांत पळोवपाक मेळटात. पावसाच्या दिसांनी तुडुंब भरिल्ल्यो बांयों आनी दर्याचीं खळखळपी ल्हारां, उंच दोंगरां वयल्यान घालून घेवपी दुदाळ, फेसाळ घसघशे पळोवप म्हणल्यार सर्गसुखच. पावसांत भुरगीं व्हडीं सोडटात, तुंबिल्ल्या उदकांत उडक्यो मारतात. पावसाळ्यांत तरेकवार भाज्यो मेळटात. कुड्डूक, तायखिळो, आळूं, लुतीची भाजी ह्या दिसांनी तकली वयर काडटात. त्यो रुचीक आनी पुश्टीक आसतात, देखून त्यो खावप भलायके खातीर बरें.
अशा ह्या रिमझिम पावसांत न्हावपाक सगळ्यांक आवडटा, पूण न्हाले उपरांत निवळ उदकान परत न्हावप गरजेचें. पावसांत सृश्टी मनांत नवचैतन्य निर्माण करता. उदक सांठिल्ले पळोवन मंद- मंद पावलां घालचीं, अशें सगल्यांकूच जाता. पावसाळ्यांत वातावरण सुंदर, पूण तातूंत ओलसाण आसता, देखून आपली काळजी घेवप गरजेचें. भायर वतना उबदार कपडे वापरचें. आंगार ओले कपडे दवरप धोक्याचें थारूं शकता.
पावसाच्या दिसांनी गरम आनी ताजोच आहार घेवप म्हत्वाचें. थंडी- खोकली जाल्यार पुदिना, कांदो, तुळस, गंजन आनी आलें घालून केल्लो कसाय (काडो) पियेवप बरें. आतां तो बाजारांत विकत मेळटा. कसायाक लागून रोखडोच फरक पडटा. पूण काडामोड चड दीस उरल्यार दोतोराचो सल्लो घेवप बरें.
घरांत शिजयिल्लें ताजें अन्न खावचें. भायर उक्त्यार विकतात ते मसालेदार वा तेलकट पदार्थ खावप टाळचें. वडा- पाव, रस- ऑम्लेट वा पाणी-पुरी खावप बंद करचें. घरा भोंवतणची सुवात नितळ दवरची, कारण पावसांत डेंग्यू, मलेरिया, टायफॉयड आनी कॉलरा सारकीं दुयेंसां पातळपाची भिरांत आसता.
कामा खातीर भायर वतना वांगडा दोन बाटल्यो शुद्ध उदक आनी एक जोडी कपडे दवरचे. पावसात भिजल्यार, ओले कपडे तशेंच घालून बसप घातक. फॅन, एसी लावन बसूं नाकात. थंडी- खोकली जावपाची शक्यताय आसता, देखून छत्री वा रेनकोट, पांयांत गमबूट घालपाक विसरूं नाकात. गोंयच्या खड्डेमय रस्त्यांनी गाडी चलयतना सांबाळून. पावसांत ओले कपडे घालून फिरप आनी रातींच्या वेळार पावसात भिजप भलायके खातीर घातक थारूं शकता, हें मोगी जोडप्यांनी समजून घेवचें. तांची भलायकी इबाडटली. तेन्ना हो सुंदर पावसाळो सगल्यांनी भलायकी सांबाळून एन्जाॅय करचो.

सिद्धी तिळवे
7972535321