भांगरभूंय | प्रतिनिधी
पणजी: ह्या वर्साच्या पावसान जायते विक्रम मोडल्यात. ह्यान पयलीं जुलय आनी ऑगस्ट हे दोन म्हयन्यांचो सगळ्यांत चड पावस पडपाचो विक्रम मोडिल्लो. आतां मेरेन राज्यांत दुसरो सगळ्यांत चड पावस पडला. राज्यांत १ जून ते ८ सप्टेंबर ह्या काळांत सरासरी १६०.४६ इंच पावस पडला. हाचे आदीं १९६१ वर्सा, २०२० वर्सा अनुक्रमान १६० आनी १६२ इंच पावस पडिल्ल्याची नोंद जाल्ली.
राज्यांत पावसाची वर्सुकी सरासरी १२९ इंच आसा. जाल्यार जून ते सप्टेंबर मजगतींच्या हंगामी पावसाची सरासरी ११३ इंच आसा. अंदूच्या पावसान हे दोनूय विक्रम पयलींच मोडल्यात. राज्यांत ७ ऑगस्ट मेरेन सरासरी १३२.६९ इंच पावसाची नोंद जाल्ली. जाल्यार हंगामी पावसाची सरासरी ३१ जुलयाक जाल्ली.
वाळपय १ जून ते ९ सप्टेंबर २०८.३१ इंच पावसाची नोंद जाल्या. जाल्यार सांग्यार १९९.५२ इंच, सांखळे १७६.११ इंच, केप्यां १७४.४७ इंच, पेडण्यां १६४.७५ इंच, पोरणें गोंय १५७ ,फोंड्यां १५६.७० इंच , काणकोणांत १५१.८३ इंच , पणजे १४७.९० इंच, मडगांवां १४६.८१ इंच , म्हापश्यां १४४.६० इंच, मुरगांवां १३९.५० इंच जाल्यार दाबोळे १२५ इंच पावसाची नोंद जाल्या.
राज्यांत ४ जुनाक मान्सुनाक सुरवात जाली. सुरवातेक पावसाचें प्रमाण उणें आशिल्लें. ७ जुना उपरांत पावसाचें प्रमाण वाडलें. तशेंच जायते कडेन हुंवाराची परिस्थिती निर्माण जाली. न्हंयांच्यो पातळ्यो वाडल्यो. कांय सुवातांचेर उदक घरांनी भितर सरलें. मजगतीं घरांचेर झाडां पडून कोट्यांनी रुपयांचें लुकसाण जालें. तशेंच शेतांचेंय लकसाण शेतकारांक सोंसचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
