भांगरभूंय | प्रतिनिधी
पणजे महालक्ष्मी देवळा लागीं धांवते मोटरीचेर पडलें झाड
चार दीस येलो अॅलर्ट
पणजी : उण्या दाबाच्या पट्ट्याक लागून गोंयांत पावसाचें धुमशेण कांडप सुरूच आसा. हवामान खात्यान आयज ऑरेंज अॅलर्ट जारी केला. बुधवारा परस बिरेस्तारा पणजेंतली स्थिती बरी आशिल्ली तरी सांजवेळा महालक्ष्मी देवळा कुशीक धांवते मोटारीचेर झाड पडलें. झाडाक लागून रस्त्या वेली येरादारी कांय वेळ ठप्प जाली.
बिरेस्तारा फाटल्या 24 वरांत राज्यांत सरासरी 56.1 मिमि (अडेज इंच) पावसाची नोंद जाल्या. पणजेंत सकाळी 8.30 ते सांजे 5.30 मेरेन 23.6 मिमि पावसाची नोंद जाल्या. आतां मेरेन राज्यांतलो सरासरी पावस 565.7 मिमि (22.27 इंच) जाला. 29 जून मेरेन 871.8 मिमि (34.32 इंच) पावस पडपाक जाय . वट्ट सरासरी परस 12 इंच पावस उणो आसा. हें प्रमाण 35 टक्के जाता. फाटल्या तीन दिसांच्या पावसांत तूट उणी जाल्ली आसली तरी ती अजून भरून येवंक ना. जूनांतलो पावस हो सरासरी परस उणोच आसतलो.
30 जून ते 3 जुलय मेरेन पावसाचें प्रमाण चड आसतलें. 3 जुलय मेरेन हवामान खात्यान येलो अॅलर्ट जारी केला. उत्तर आनी दक्षीण गोंयांत पावसाचें प्रमाण चड आसतलें. कांय कडेन उटंगाराच्या पावसाचो अदमास आसा. वारें वराक 40 ते 50 किमि नेटान व्हांवतलें अशी शिटकावणी हवामान खात्यान दिल्या.
बिरेस्तारा पणजेंत पावसाचें प्रमाण तुळेन उणे आशिल्लें. थारावीक अंतरान पावसाच्यो दडको पडत रावल्यो. पावस मदीं विसव घेतालो. हाका लागून मंगळारा भशेन रस्ते उदका पोंदा गेले नात. तरी लेगीत रस्त्यांचेर चिखल व्हांवून येवपा सयत रस्तो नेमपाचे प्रकार सुरूच आसले. दिसभर सगल्या वाठारांनी झाडाच्यो खांदयो पडून वीज पुरवण खंडीत जाली. म्हापश्यां सेंट ब्रिटो विद्यालया कुशीची राखणे वणत परतून कोसाळ्ळी. हातूंत कोणूच जखमी जावंक ना. फाटल्या वर्सा हीच राखणे वणत कोसळून मोटारींतली बायल जखमी जाल्ली.
पावसाक लागून जीण विस्कळीत जाल्या. धरणांतल्या उदकाचें प्रमाण वाडपाक लागिल्ल्यान पियेवपाच्या उदकाचो उणाव आतां जावपाची शक्यताय ना. सेगीतच्या पावसाक लागून शेतांची कामां सुरू जाल्यांत. पणजेंतलें चडांत चड तापमान 28.1 अंश नोंद जालां. तापमान देंवपाक लागिल्ल्यान गरमे सावन लोकांक थाकाय मेळ्ळ्या.
वाळपय घराचेर झाड
पडून देड लाखाचें लुकसाण
मजगतीं, मेळिल्ले म्हायती प्रमाण वाळपय शारांतल्या ठाणें मार्गा वयले जामा मशिदी कुशीक मुतांझीर खान हांच्या घराचेर आंब्याचें झाड पडिल्ल्यान सुमार देड लाखाचें लुकसाण जालें. ही घडणूक रातच्या 8 वरांचेर घडली. कांय प्रमाणांत वादळी वारो जालो आनी घराचे एके वटेन झाड पडलें. हाका लागून पाख्याचें व्हड प्रमाणांत लुकसाण जाल्ल्याची म्हायती उपलब्ध जाल्या. वाळपयच्या उजो पालोवपी दळान पडिल्लें झाड कुशीक काडलें. लाखांनी रुपयांची मालमत्ता वाटावपाक दळाक येस आयलें. तरी लेगीत ह्या कुटुंबाक सुमार देड लाखाचें लुकसाण जालें.
मडगांवां रेल्वे स्टेशना लागसार झाड पडलें
मडगांव वाठारांत दीसभर पावस पडटालो. वादळी वाऱ्याक लागून मडगांवच्या रेल्वे स्टेशना लागसारचें झाड हुमटून पडलें. ताका लागून कांय वेळ येरादारी विस्कळीत जाली. तेचवरी राय वाठारांत लेगीत रस्त्याचेर झाड पडलें. तशेंच मडगांवच्या ला फ्लोअर हॉटेला लागसार आंब्याच्या झाडाचो खांदो मोडून अर्दवट स्थितींत आशिल्लो. थळाव्या लोकांनी उजो पालोवपी दळाक म्हायती दिले उपरांत तांणी येवन मोडिल्लो खांदो कातरून रस्तो येरादारी खातीर मेकळो केलो.
फाटल्या 24 वरांतलो पावस
ठिकाण पावस (मिमि)
म्हापशें 43.2
पेडणें 75.8
फोंडें 75.4
पणजी 61.2
पोरणें गोंय 48.0
सांखळी 33.4
काणकोण 55.6
दाबोळी 24.6
मडगांव 68.0
मुरगांव 48.0
केपें 70.0
सांगें 70.2
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
