भांगरभूंय | प्रतिनिधी
पणजी, प्रतिनिधी : मॉन्सून पावपाक कांय दीस आसले तरी राज्यांत आडवेळ्या पावसाचें धुमशेण चालूच आसा. सद्दां सांजवेळा 5 ते रातीं 12 मेरेन पावस पडटा. गडगड मारता, लायट गायब जाता. बिरेस्तारा साखळे वाठारांत सगळ्यांत चड म्हळ्यार 3.18 इंच पावसाची नोंद जाल्या. साखळे उपरांत फोंड्यां 2.39 इंच जाल्यार पोरणें गोंयां 2.15 इंच पावसाची नोंद जाल्या. फाटल्या 24 वरांत म्हापशें, मुरगांव, केप्यां हांगा उणो पावस पडला. आयतारा 26 मे मेरेन हवामान खात्यान येलो अॅलर्ट जारी केला. तशेंच 30 मे मेरेन सेगीत पावस झडटलो असो अदमास उक्तायला.
हवामानांत जाल्ल्या बदलाक लागून दर दिसा सकाळीं दमट वातावरण आसता. सकाळीं दमट आनी सांजे गडगड मारून पावस, अशी सध्याची स्थिती. गर्मी जाता तरी सदच्या पावसाक लागून सांजवेळा, रातीं वातावरणात थंडसाण तयार जाल्या. ही थंडसाण थाकाय दिवपी आसा.
आडवेळ्या पावसाक लागून झाडांच्यो खांदयो पडप, वीजपुरवण खंडीत जावप हे प्रकार चालूच आसा. रस्त्याचेर उदक भरता आनी येरादारीची कोयंडी जाता. रस्त्यार तुंबपी उदकाक लागून येरादारीचेर परिणाम जाला.
आडवेळ्या सरासरी पावसाचे प्रमाण 118.7 मीमी (4.67 इंच) इतले जालां. हे प्रमाण 194 टक्के चड आसा. 1 मार्च उपरांतच्या पावसाची गणती आडवेळ्या पावसांत जाता.
………….
सगळ्या वाठारांतलो पावस (1 मार्च उपरांतचो)
वाठार 24 वरांतलो (मिमी) आतां मेरेनचो (मिमी)
म्हापशें 5.0 36.7
पेडणें 5.4 38.2
फोंडें 60.8 284.4
पणजी 8.0 169.6
पोरणें गोंय 54.8 197.0
साखळे 80.8 169.2
वाळपय 26.9 152.6
काणकोण 15.2 143.0
दाबोळे 17.4 115.2
मुरगांव 8.2 121.4
केपें 8.0 61.4
सांग्यार 10.8 51.7
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
