भांगरभूंय | प्रतिनिधी
केंद्रीय जल शक्ती मंत्रालयान आपल्या ‘जलनायक। नायिका : सांगात तुमच्यो कथा’ हे सर्तीचो निकाल जाहीर केला. तातूंत दिव्यांश टंडन (मेरठ), विनय विश्वनाथ गावस (केरी- सत्तरी), अमित (उत्तर प्रदेश), बबीता राजपूत घुवारा (मध्य प्रदेश), अनुराग पटेल (बांदा), स्नेहलता शर्मा (शिवपुरी) हे जैतिवंत थारल्यात.
केंद्रीय जल शक्ती मंत्रालया खाला उदक संसाधन, न्हंय उदरगत आनी गंगा कायाकल्प खात्यान ही सर्त सुरू केल्या. ह्या प्रकारची ही तिसरी सर्त मायगव्ह पोर्टलाचेर 1 डिसेंबर 2021 सावन सुरू जाल्या. ती 30 नोव्हेंबर 2022 मेरेन चालू आसतली. दुसरी सर्त 19 सप्टेंबर 2020 सावन सुरू जावन 31 ऑगस्ट 2021 दिसा सोंपली.
सामान्य लोकां मदीं उदकाचें म्हत्व रुजोवपाच्या यत्नांक उर्बा दिवप हो ही सर्त घडोवन हाडपा फाटलो हेतू. प्रधानमंत्री नरेंद्र मोदी हांचे संकल्पने प्रमाण देशांत उदका संवर्धनाचेर काम करपाक सामान्य लोकां मदीं जागृताय निर्माण करप गरजेचें आसा. हे सर्तींत स जैतिवंत ऑगस्ट 2022 म्हयन्या खातीर वेंचून काडल्यात आनी तांकां धा हजार रुपया रोख इनाम आनी प्रमाणपत्र दितले.
केरी पंचायतीच्या रावण- केळावड्यां उदकाचो सांठो वाडोवपाच्या हेतान फाटल्या कांय वर्सां सावन विनय गांवस ह्या प्रकल्पाचेर काम करतात. प्रकल्पाक गोंय सरकाराच्या शिंपणावळ खात्याचो म्हत्वाचो आदार मेळ्ळो. गोंय शिंपणावळ खात्याचे मुखेल अभियंते प्रमोद बदामी आनी वरिश्ठ अधिकाऱ्यांनी भेट दिवन प्रकल्पा खातीर विनय हांकां परबीं दिल्लीं. पावसाच्या दिसांनी व्हड प्रमाणांत उदकाचो नाश जाता. खासा प्रकल्पा वरवीं हें उदक सांबाळ्ळें जाल्यार फायद्याचें थारूंक शकता. जमनींतली उदकाची पातळी उणी जायत आसा. पूण, जमनी पोंदा उदक सांठयल्यार वा जिरयल्यार ताचे पयस मेरेन फायदेशीर परिणाम जावंक शकतात. हे संदर्भांत विनयान हो प्रकल्प चालीक लायिल्लो.
जैतिवंतांचीं वळख
–
विनय विश्वनाथ गांवस
केरी- सत्तरी वाठारांतल्या केळावडें गांवांत पांख्या (छप्पर) वयलें पावसाचें उदक एकठांय करपा खातीर आनी कूपनलिका रिफिलिंग करपा खातीर सुरू केल्ले मोहिमेचे विनय गावस हे प्रकल्प संचालक. हो प्रकल्प टेरीच्या सहकार्यान स्थापन करपाचो आसा.
–
दिव्यांश टंडन
मेरठाच्या दिव्यांश टंडन ‘पाणी पंचायत’ हे मोहिमे कडेन संबंदीत आसा. ते वेगवेगळे गांव, रस्ते, शाळा, वसणुकांक भेट दितात आनी लोकां मदीं उदका संबंदी जागृताय करतात. सारथी समाज कल्याण संस्था (मेरठ छावणी) हे संस्थेचे ते उपाध्यक्ष.
–
अमित
उत्तर प्रदेशांतल्या जालोन जिल्ह्यांतल्या मलकपुराचो गांव मुखेली आनी दिल्लींत पत्रकार आशिल्ल्या अमितान गांवचे मुळावे शाळेक पुश्टीक अन्न दिवप, झाडां लावप, पर्यावरण संरक्षण आनी उदक शुद्ध करपाची प्रक्रिया करप अशा जायत्या उदरगतीच्या उपक्रमांनी वांटो घेतला.
–
बबीता राजपूत घुवारा
मध्य प्रदेशांतल्या छत्तरपूरच्या बबीता राजपूत घुवारा चार चेक धरणां आनी दोन आऊटलेट बांदपाच्या कामांत तशेंच बोरी बंधन बांदपाच्या कामांत वांटो सक्रिय आसात.
–
अनुराग पटेल
बांदा जिल्लो दंडाधिकारी अनुराग पटेल हांणी उदका संवर्धनात म्हत्वाचे यत्न करपा खातीर ‘जल कुंभी हटाओ- तालाब बचाओ’ आनी ‘जल संचय, जीवन संचय’ ह्यो दोन म्हत्वाच्यो मोहीम सुरू केल्यात. वाठारांतल्या 126 तळ्यांतल्यान उदकांतली जलपर्णी काडपाक तांणी वेगवेगळे उपक्रम सुरू केल्यात. तशेंच कायाकल्पाच्या हेतून आनीक कांय मैल खणून चंद्रवाल न्हंय परतून जिवंत करपाचे खाशेले यत्न केले. तांच्या यत्नांक लागून मिर्झापूरांतलीं 664 तळीं आनी फारुखाबाद जिल्ह्यांतलीं 101 तळीं परत आशिल्लीं तशीं जाल्यांत.
–
स्नेहलता शर्मा
शिवपुरी जिल्ह्यांतल्या पिप्रोधाच्या बदरवास ब्लाॅक हांगा रावपी स्नेहलता शर्मा फाटल्या एका वर्सा सावन उदका संवर्धन आनी वेवस्थापनाच्या मळार खूब तोखणायेचें काम करता. गांवांत उदक आनी ताच्या संवर्धना विशीं जागृताय निर्माण करपाक तिणें बायलांक मुखार हाडलीं. तशेंच शेतांत उण्या उदकान पिकोवंक मेळटा अशा पिकां विशीं जागृताय केली
.
– उदय सावंत
79720 79443
————————
सर्तींत तुमीय वांटेकार जायात
ही सर्त म्हयन्याळ्या तत्त्वाचेर जाता आनी ताची म्हायती मायगव्ह पोर्टलाचेर मेळटा. हे सर्तींत वांटो घेवपाची इत्सा आशिल्ल्या सर्तकांनी आपल्यो उदका संवर्धन यशस्वी कथा 1 ते 5 मिनटां काळाच्या व्हिडियोच्या रुपांत सुमार 300 उतरांचें बरयल्लें वर्णन आनी ह्या पोर्टलाचेर आपलें काम दाखोवपी कांय फोटो धाडपाची अपेक्षा आसा. स्पर्धकांनी हें (आपल्या व्हिडियोच्या युट्युब लिंका वांगडा) www.mygov.in ह्या संकेतथळार शेअर करूं येता. ते भायर अर्जदारांनी [email protected] ह्या संकेतथळा वरवींय आपल्यो प्रवेशिका सादर करूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
