पावसाक लागून कला अकादमीचें पाखें कोसळ्ळें

भांगरभूंय | प्रतिनिधी

पणजी, प्रतिनिधी : गोंयचो ‘ताजमहल’ म्हूण नामना मेळिल्ली कला अकादमी परत एक फावट चर्चेंत आयल्या. पयर पडिल्ल्या आडोळ्या पावसाक लागून कला अकादमीच्या कांय भागाचें पाखें (फोल्स सिलींग) कोसळ्ळें. हे घडणुके वेल्यान विरोधकांनी सरकारांक तासपाक सुरवात केल्या जाल्यार हे घडणुकेची चवकशी जातली अशे सरकार सांगता.
आयज सकाळी सुमार 10 वरांचेर कला अकादमीच्या दीनानाथ मंगेशकर थेटरा फाटल्या भागांत फॉल्स सिलिंग कोसळ्ळें. भितल्ली पायपां भायर दिसतालीं जाल्यार सिलिंगाचे कुडके जमनीर पडिल्ले. उदकाची गळटी जावन सगळे कडेन खातड जाल्ली. जेन्ना मिडीया रिपोर्टींग करपांक गेली तेन्ना सुरक्षा रक्षकांनी तांकां दारा कडेन आडयली आनी उपरांत दारांक कुलुप मारलें.

जुलय 2023 त कला अकादमीचें उक्तें सभाघर कोसळिल्लें, इफ्फी सोपले उपरांत काय दिसांनी दीनानाथ मंगेशकार सभाघरांतले छप्पर कोसळून घसघसो व्हावपांक लागलो. उपरांत कला अकादमींत सोरोप घुसलो आनी आयज परत एक फावट सिलींग कोसळिल्ल्यान कला अकादमीचें काम परत वादांत सांपडलां.
विरोधकांनी हे घडणुके वेल्यान सराकारचेर टीका करपाक सुरवात केल्या. ताज महालाक 500 वर्सां परस चड जालीं, पुण अजून ताका कसलेच लुकसाण जावंकना किद्याक तर शाहजहानान कंत्राटदारा कडल्यान कमिशन घेवंक नासलें. जर पावसांन शारांत बरोच नेट धरलो जाल्यार कला अकादमी मांडवींतलो उफेवपी ताजमहाल जातलो, असो थोमणो काँग्रेसीचे गोंय प्रदेश उपाध्यक्ष सुनील कवठणकार हांणी मारलो.
सुमार 75 कोटी रुपया खर्च करून नुतनीकरण केल्ले कला अकादमीच्या कामाचें चार्ल्स कोरिय्या फावंडेशना कडल्यान ऑडीट करचें, अशी मागणी गोवा फाॅर्वेडाचे उपाध्यक्ष दुर्गादास कामत हांणी केली जाल्यार कला अकादमी हे सरकाराच्या बाबत साधन सुविधा कामांची गवाय दिता. कला अकादमी भशेनच नवो जुवारी पुल आनी अटल सेतूचेय बाबत काम जालां, असो आरोप आरजीपीचो आमदार विरेश बोरकारान केला.जाल्यार सत्ताधारी भाजपान कला अकादमीच्या विषयाचेर स्पष्टीकरण दिलां. कला अकादमीचे सिलींग कोसळपाचे घडणुकेचेर राज्य सरकार चवकशी करतलें. हे बाबतीत हांव मुख्यमंत्र्या कडेनूय चर्चा केल्या, अशे भाजप प्रदेशाध्यक्ष सदानंद शेट तानावडे हांणी सांगलें.