पावसांत शाळा सुरक्षीत करात

भांगरभूंय | प्रतिनिधी

शाळेचीं पांखीं हुबतकच आनी इमारती पडटकच एकामेका कडेन बोट दाखोवच्यो परस आदींच ‘मनीसपणाचो’ वर्ग घेयात आनी शाळा सुरक्षीत करात.

सैम आमकां कांय गजालींचेर शिटकायता. पूण घडये आमी ताचेर आडनदर करतात वा मागी पळोवया म्हूण सुसेगाद रावतात. हीं सुसेगादपणां मागीर आमकां पश्चताप करपाक लायतात. ते खातीर सैमाची शिटकावणी आमी आडनदर करून फावना.
जून म्हयन्याच्यान घोग्यांनी पावस पडटलो. फाटल्या कांय दिसांनी पावस पडटा आनी आपूण येता हाची सुलूस लायता. आमी ते खातीर पुरुमेंतय करून दवरतात. आमच्या पुरुमेंतांत खाणाचे जिनस, घरां परतूवप आनी गांवांनी जळोव दवरपा खातीर अजूनय कांय कडेन खोंपी बांदतात. हें सगळें करतना आमी आमच्या सरभोंवतणी नदर मारून खंयूय पालसणां कोसळपाचो धोको आसल्यार, शाळेची, विद्यालयाची वा सरकारी कार्यालयांच्या इमारतींक धोको आसल्यार ते विशीं संबंदितांक पयलींच कळोवप गरजेचें.
पावस येतलो, तळीं, बांयों उपाट भरतलो आनी शेतीक नवीनिर्मिती दितलो. तो येताच ते खातीर. पूण तो येतकच अरिश्टांय येतात. तीं येवचीं न्हय म्हूण आमी खबरदारी घेवंक जाय. गोंयांत पावसाच्या दिसांनी जावपी हीं अरिश्टां वाडल्यांत. तो घडये दोंगर कांपणी खातीर आनी पर्यावरणाचेर जाल्ल्या आडनदरे खातीर आसूं येता. पावसांत कितलेशेच कडेन हुंवार येता आनी पालसणांय कोसळटात. हे हुंवार येवचे न्हय म्हूण गंभीरपणान यत्न जावंक जाय, पूण ते जातना दिश्टी पडनात.
दर पावसाच्या पयलीं मुख्यमंत्र्यान ’राज्य आपतकालीन वेवस्थान समितीची, अधिकाऱ्यांची बसका घेवप हें दर वर्सा जाता. तरीय आसतना अरिश्टां फांट सोडिनात. कित्याकतर गंभीरपणान पावलां मारप जायना. बसकांनी घेतिल्ले निर्णय फायलींनी चिड्डून उरल्यार ताचो लाव जनतेक जावंचो ना. हे खातीर अश्यो फायली चिड्डून उरच्यो नात हाची खबरदारी घेवप गरजेचें.
मुखेलमंत्री प्रमोद सावंत हांणी हालींच हे विशीं बसका घेवन उपाय घेवंक लायल्यात. तातूंत चड अॅम्बुलन्सी लोकांचे सेवे खातीर दवरप, २४ वरां कंट्रोल रूम चालू दवरप आनी कामगारबळ दिवप हाचेर चर्चा जाल्या. तांणी सगळ्या खात्यांक एकवठान काम करपाचो आदेश दिला, पूण तांच्या आदेशाचो मान राखपाचें काम सरकारी अधिकाऱ्यांनी करपाक जाय. ‘आपलो म्हयन्याचो पगार खंयच वचूंक ना— तो मेळटलोच’ हे वृत्तीन काम केल्यार लोकांचे हाल जातले. कमीत कमी वेळा भितर सैमीक दुर्घटना थळाचेर पावपाची मोख सरकारान दवरल्या. पूण ती अस्तित्वांत येवप गरजेची.
राज्यांतल्या तिनूय जिल्ल्यांक ह्या कामा खातीर पयशे दिल्यात. हे निधीचो उपेग भौशीक मालमत्ता वाचोवपाक आनी लोकांक वाचोवपाक जावप गरजेचें. ते भायर पावसांत महामार्गार जावपी अपघातांक तोंड दिवपा खातीर राष्ट्रीय म्हामार्गांचेर अॅम्ब्युलन्स दवरपाचेर चर्चा जाल्या. ही चर्चा फकत चर्चा न उरता तातूंतले निर्णय खरेपणांत येवंक जाय. पावसाच्या दिसांनी महामार्गांचेर अपघात जातकच येरादारीची गचमुड्डी जाता. अशा वेळार येरादारी सुरळीत करून, जखमी जाल्ल्यांक बेगीच्या बेगीन हॉस्पिटलांत पावोवप गरजेचें.
जेन्ना हॉस्पिटलांचो विशय येता, तेन्ना आमच्या मुळाव्या भलायकी केंद्रांनी, उप जिल्लो हॉस्पिटलांनी आनी जिल्लो हॉस्पिटलांनी सुविधाय आसप गरजेच्यो. हांगां सुविधा ना जाल्यार जखमी जाल्ल्या लोकांक गोंय वैजकी महाविद्यालयांत उपचारा खातीर धाडचे पडटात. थंय पावता म्हुणल्यार वेळ लागता आनी जखमी जाल्ल्यांच्या जिवाक धोको निर्माण जाता.
सरकारान हे गजालीचेरय लक्ष दिवन चड गरजेचें. फकत गाडयांचेच अपघात न्हय तर झाडां पडून ज्यो दुर्घटना जातात, तातुंतय लोक जखमी जावपाच्यो घडणुको घडटात. अशा सगळ्या गजालींचेर लक्ष दिवन सरकारान चड गंभीरपणान पावलां मारप गरजेचीं. ह्यो सगळ्यो सुविधा हॉस्पिटलांनी तयार केल्यार ताचो लाव जनतेक जातलोच, त्या भायर सत्तेर आशिल्ल्या पक्षाक ताचो चड लाव जातलो. सरकारान हें सगळें जाग्यार घालचें आनी पावसाची तयारी करपाक ज्यो बसका घेतात ताका खरो ‘अर्थ’ दिवचो. नाजाल्यार ताका कांयच अर्थ उरना.
राज्य सरकारान, भारतीय नौसेनेच्या 10 बचाव बोटींचोय आदार घेवपाचो विचार चलयला. जमनीर वा दर्यांत जावपी सगळ्यांक दुर्घटनांक सरकार जापसालदार आसता अशें ना. तर कांय वेळार लोक मस्ती करून न्हंयेंत, दर्यांत वतात आनी बुचकळटकच तांकां वाचोवपाक सरकाराक पावलां मारचीं पडटात.
जंय जंय मिना खणी वा चिऱ्यांच्यो खणी भरून उरतात, थंय वंय घालपाचें काम हातांत घेता अशें सरकारान म्हणिल्लें. त्यो वंयो घातल्यात काय घाल्ल्यो चोरून व्हेल्यात हाचेरय सरकाराची एक नदर पडप गरजेची. पावसाच्या दिसांनी अशा थळांनी बुडून मरपी लोकांचो आंकडो तसो उणो ना. ह्यो सगळ्यो गजाली जाग्यार घातल्यो जाल्यार नक्कीच लोकांक ताचो लाव जातलो.
पावसाच्या चार म्हयन्यांत एनडीआरएफाचो पंगड गोंयांत आसतलो, जाल्यार दर्यादेगेर ‘सागर कवच’ कारवाये खाला तटरक्षक दलाच्यो दोन बोटी तैनात आसतल्यो अशें कळटा. लोकांनी ह्या पंगडांक सहकार्य करप चड गरजेचें आसा आनी दुर्घटना जावच्यो न्हय म्हूण एकामेकाक जागृत करपाची गरज आसा.
पावसांत भलायकेच्या हुस्क्याचेर उलयतना डेंग्यू, मलेरिया सारकिल्लीं दुयेंसां आडावपा खातीर स्थलांतरीत कामगारांच्या रगताची चांचणी करप गरजेची. नुस्तेमारी करपी बोटींचेर कामाक येवपी कामगार हे चडशे भायल्या राज्यांतले. ते जेटींचेर ज्या ज्या सुवातांनी रावतात थंय वांठार नितळ आसा काय ना, तांकां उदक नितळ मेळटा काय ना हाचीय तपासणी जावंक जाय. तशेंच भाड्याच्या घरांत रावपी कामगारांची भलायकी तपासणी करपाची गरज आसा.
सरकारान जारी केल्ल्या हेर म्हत्वाच्या निर्देशां मदीं घातक झाडां कातरप, धोकादायक होर्डिंग्स काडून उडोवप, गटार आनी उदकाचे स्रोतांचेर नदर दवरप, हुंवार आनी भूंयकांप जावपाची शक्यताय आशिल्ल्या वाठारांचेर नदर दवरप, आपत्कालीन संचारण यंत्रणा घटमूट करप, गरजेचीं वखदां आनी पुरवण सांठोवप आनी गरजेची जतनाय घेवप हांचो आस्पाव आसा. सरकारी अधिकाऱ्यांनी ही गजाल सामकी म्ह्त्वाची धरून तळमळीन काम करूंक जाय.
तशेंच सगळ्यांत म्हत्वाचें म्हणल्यार आमचीं ल्हान ल्हान भुरगीं ज्या शाळांनी शिकपाक वतात, त्यो शाळा सारक्यो आसात काय त्यो खंयच्याय खिणाक पडपाक शकतात, तांचें पांखे हुबून वचपाक शकता हाची तपासणी करपाची गरज आसा. अश्यो शाळा वा विद्यालया सांपडलीं जाल्यार थंयच्या विद्यार्थ्यांची दुसरे कडेन वेवस्था करप आनी तांकां शिकपाची सुरक्षीत सुवात दिवप हें सरकाराचेंच काम. शाळेचीं पांखीं हुबतकच आनी इमारती पडटकच एकामेकां कडेन बोट दाखोवचे परस आदींच ‘मनीसपणाचो’ वर्ग घेयात आनी शाळा सुरक्षीत करात.

संजय बोरकार
9921343430