भांगरभूंय | प्रतिनिधी
वाळपय उजो पालोवपी दळाच्या जवानांनी हाडलो उबारून
वाळपय: पाली वाठारांत घसघशार पांयभोंवडी करपा खातीर गेल्ल्या पणजी रोझरी हायस्कुलाचो एक विद्यार्थी जखमी जाल्ल्यान ताका वाळपय उजो पालोवपी दळाच्या जवानांनी वेवस्थीत दोंगरा वेल्यान सकयल हाडलो. ताच्या पांयाक दुखापत जाल्ल्यान वाळपयच्या सरकारी समाजीक हॉस्पिटलांत दाखल केला. घसघशार पांयभोंवडी करीत आसतना ताचो पांय घसरिल्ल्यान ही घडणूक घडिल्ल्याची म्हायती दळा कडल्यान मेळ्ळी.
पणजेच्या रोझरी हायस्कुलाचो आठवी आनी णवी विद्यार्थ्यांचो सुमार 90 जाणांचो गट पाली हांगासरल्या घसघशार पांयभोंवडी करपा खातीर गेल्लो. भोंवडी करीत आसतनाच रुबेन परेरा ह्या विद्यार्थ्याचो पांय अचकीत घसरलो आनी ताका दुखापत जाली. जंय ही घडणूक घडली तो वाठार अडचणीचो आनी दोंगराळ आशिल्लो. ताका लागून ताका वेवस्थीतपणान दोंगराचे सकयल हाडप शक्य जालें ना.
निमाणें वाळपय उजो पालोवपी दळा कडेन संपर्क सादले उपरांत दळाचे अधिकारी सतीश नायक, आदम खान, दत्ताराम देसाय, एस एन गांवस, डी एस सावंत हांणी घडणूक थळार धांव घेवन विद्यार्थ्याक सुखरूप पाली हांगासरल्या देवूळ वाठारांत हाडलो. उपरांत 108 एम्बुलन्सीन ताका वाळपय सरकारी समाजीक हॉस्पिटलांत दाखल केलो.
मजगतीं, सत्तरी म्हालांतल्या घसघशांचेर पांयभोंवडी करपा खातीर गोंयच्या वेळ्यावेगळ्या वाठारांतले विद्यार्थी व्हड प्रमाणांत येत आसतात. तांकां ह्या वाठाराचे परिस्थितीचो अदमास नाशिल्ल्यान खूबशे फावटी पडून जखमी जावपाचे प्रकार सेगीत घडत आसतात. पाली हांगा काल अशेच तरेचो प्रकार पळोवंक मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
