भांगरभूंय | प्रतिनिधी
मडगांव, प्रतिनिधी ः नगराध्यक्ष आनी आदले मुख्याधिकारी हांचे आरोप, प्रत्यारोप सुरू आसात, पूण ताका लागून पालिका मंडळाक फटको बसता. देखून नगराध्यक्ष दामोदर शिरोडकार हांणी खाशेली बसका घेवन सगल्या नगरसेवकांक विस्वासांत घेवन नेमकें कितें जालां ताची म्हायती दिवची, अशें नगरसेवक महेश आमोणकार हांणी मागलें.
हाचे आदीं कनिश्ट लिपिक योगेश शेटकार हांणी फेस्ताचे फेरयेंच्या पयशांच्या वेव्हारात भानगड करुन साडेसतरा लाखांची अफरातफर केल्ली, अशें नगरसेवक आमोणकार हांणी पत्रकार परिशदेंत सांगलें. नगराध्यक्ष दामोदर शिरोडकार हांणी हें विशीं रोखडीच सगल्या नगरसेवकांक म्हायती दिवन एक खाशेली बसका घडोवन हाडली. तेन्नाचे मुख्याधिकारी गौरीश शंखवाळकार हांचे कडल्यान भानगड जाल्या, असो आरोप नगराध्यक्ष शिरोडकार हांणी केला. अशे तरेच्यो भानगडी जाल्यार नगराध्यक्ष शिरोडकार हांणी सगल्या नगरसेवकांक विस्वासांत घेवन ताचे विशीं कल्पना दिवपाक जाय आशिल्ली. पूण तशें जावंक ना. नगरसेवक आशिल्ल्यान लोक आमकां प्रस्न विचारतात. तशेंच शेटकार हांणी केल्ल्या पयशांच्या भानगडींतले साडेसतरा लाख रुपया मेळयले बगर आपूण मुख्याधिकार्यांची बदली जावपाक दिवचो नात अशें हाचे पयलीं नगराध्यक्ष शिरोडकार हांणी सांगिल्लें. तांची बदली जाले उपरांत तांचेर आरोप करप योग्य न्हय. शंखवाळकार हांची परतून मडगांव पालिकेंत बदली करची. आतां सध्या कांय भानगडी भायर सरल्यात, पूण आनीक कांय भानगडी आसात अशें नगराध्यक्षांनी प्रसारमाध्यमांक सांगलां. मडगांव पालिकेंत अशें तरेच्यो भानगडी जाता जाल्यार मागीर नगराध्यक्ष शिरोडकारान नगराध्यक्ष केल्ल्या नगरसेवकांक विस्वासांत घेवपाची गरज आसा, तांकां सगळी म्हायती दिवपाची गरज आसा. फकत आरोप, प्रत्यारोप करुन नगरसेवकांक नागरिकांच्या प्रस्नांक तोंड दिवचें पडटा अशें आमोणकार हांणी सांगलें.
नगराध्यक्ष शिरोडकार हांणी आरोप करिनासतना तेन्नाचो मुख्याधिकारी खंयचे भानगडींत घुस्पल्यात हें खाशेली बसका घेवन सगल्या नगरसेवकांक सांगचें. फाटले चार म्हयने सार्वत्रिक बसका जावंक ना. तांकां पयलींच सार्वत्रिक बसका घेवपाची विनवणी केल्या. तांतूतल्यान अशे प्रकार नगरसेवकां मुखार येतले अशें आमोणकार हांणी सांगलें.
पालिका क्षेत्रांत बेकायदेशीर वावर चालूच
फूटपाथा वयले बेकायदेशीर वेवसाय अजूनय चालू आसात. मडगांवांत अजूनूय चोर बाजार भरता. रेंट अ बायक आनी पालिके लागसारच्या रस्त्यांचेर अजूनय गाडयो पार्क करतात. तांचे कडल्यान जो कोण पयशे घेता तेय मुखार येवपाची गरज आसा. योगेश शेटकार घरांत बसला. ताका हाडलो जाल्यार ह्या भानगडींत कोणाचो हात आसा तें समजतलें अशें नगरसेवक महेश आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
