भांगरभूंय | प्रतिनिधी
मडगांव, प्रतिनिधी ः छत्रपती संभाजी महाराज हांच्या पुतळ्याक लागून मारुती देवळाच्या परिक्रमेक आडखळ निर्माण जाता हो मारुती देवूळ ट्रस्टचो दावो सामको चुकीचो आनी गोंयकारांची दिशाभूल करपी आसा. परिक्रमेक फावो ती सुवात सोडल्या. ह्या प्रकरणांत जिल्होधिकाऱ्यांनी बसका घेतल्या आनी अजून निर्णय जावंक ना. जिल्होधिकारी दितले तो निर्णय आमकां मान्य आसतलो अशें शिवमोगी आनी पंच विनायक वळवयकार हांणी सांगलें.
रुमडामळ- दवर्लेच्या मारुती देवळा मुखार आशिल्ले सुवातेर शिवमोगींनी छत्रपती संभाजी महाराजांचो पुतळो उबारला. ह्या पुतळ्याक लागून देवळाच्या पालकी परिक्रमेक आडखळ येतात अशी कागाळ देवूळ ट्रस्टाचे अध्यक्ष भाई नायक हांणी केल्ली. ते प्रमाण जिल्लोधिकारी कार्यालयांतय बसका जाली. ते बसकेंत पुतळो स्थलांतरणाचो विशय आयलो तेन्ना शिवमोगींनी तो पर्याय मान्य केलो ना. हें बसकेंत कसलोच निर्णय जालो ना.
विनायक वळवयकार आनी हेर शिवमोगींनी शेनवारा पत्रकार परिशद घेतली आनी मारुती देवळाची पालकी परिक्रमे खातीर फावो ती सुवात आसा आनी पुतळ्याक लागून कोणाक कसलींच आडखळ जायना अशें सांगलें. हिंदू धर्माच्या संरक्षणा खातीर छत्रपती संभाजी महाराजांचो पुतळो उबारला. तातूंत कोणाचोच, कसलोच सुवार्थ ना अशें वळवयकार हांणी सांगलें. रुमडामळांतल्या परिस्थिती प्रमाण हो निर्णय घेवचो पडलो. मारुती देवळाच्या खंयच्याय कार्यात आडखळ हाडपाचो आमचो हेतू ना. धर्माचो आमकांय अभिमान आसा आनी ताचे खातीर खंयच्याय पांवड्यार वचपाक आमी तयार आसात. पूण ही समस्या फक्त एका मनशाक लागून निर्माण जाल्या. शांतताय आनी सुवेवस्था इबाडटली अशें कसलेंच काम आमी केन्नाच करचें नात. हाका लागून जिल्होधिकाऱ्यांच्या बसकेंत जो निर्णय जातलो तो आमकां मान्य आसतलो अशेंय वळवयकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
