भांगरभूंय | प्रतिनिधी
भांगरभूंय । प्रतिनिधी
म्हापशेंः मयते आनी कैलासनगर हांगा पार न्हंयेंत घाणारें उदक सोडटात. हे दुशीत उदक अस्नोडेच्या उदका शुद्धिकरण प्रकल्पांत वापरतात आनी ताची पुरवण बार्देश आनी दिवचल तालुक्यांतल्या लोकांक करतात. हाका लागून तांचे भलायकेचो प्रश्न उप्रासला. हाचेर उपाय म्हणून घाणयाऱ्या उदका खातीर सोक पीट बांदपा खातीर अस्नोडें पंचायतीक खासा अनुदान दिवपाची मागणी काँग्रेस पक्षाचो म्हणयारे संजय बर्डे हांणी केल्या.
अस्नोडें पंचायत वाठारांतल्या मयतें आनी कैलासनगर वाठारांतल्या घरांतले घाणयारें उदक गटारां वरवी पार न्हंयेंत सोडटात. तिळारी धरणाचें उदक मेळना तेन्ना पार न्हंयेतलें उदक अस्नोडें उदका प्रकल्पांत व्हरतात अशी म्हायती बर्डे हांणी दिल्या. बार्देश आनी दिवचल तालुक्यांतल्या लोकांचे भलायकेची जतनाय पंचायत तशेंच सरकारान घेवपाक जाय. घाणयारें उदक पार न्हंयेंत सोडचें न्हय हे खातीर ह्या वाठारांत सोक पीटांची वेवस्था करपा खातीर सरकारान अनुदान दिवचें असो थाराव पंचायत मंडळान घेवपो अशी सूचोवणी तांणी केल्या. हे विशीं आपणं पंचायत तशेंच भौशीक बांदकाम खात्यान निवेदन सादर केला अशें तांणी सांगलें.
बार्देश तशेंच दिवचल तालुक्याच्या कांय वाठारांत अस्नोडें उदका प्रकल्पांतल्यान उदका पुरवण जाता. तातूंतल्यान जर दुशीत उदकाची पुरवण जाता जाल्यार ती एक गंभीर गजाल आसा. ह्या प्रकल्पा लागींच एक हॉटेल आसा. तातूंतलें घाणयारें उदक पार न्हंयेंत सोडटात असो दुबाव आसा. सरकारान ताची चवकशी करची अशी मागणी बर्डे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
