भांगरभूंय | प्रतिनिधी
लाखांनी रुपयांचें लुकसाण; घर धनी किरकोळ जखमी
म्हापशें: पाजीर, उसकय उजो लागून एका घराचो चडसो भाग जळून गोबर जाल्ल्यान लाखांनी रुपयांचें लुकसाण जालां. म्हापशें उजो पालोवपी दळाच्या जवानांनी उज्याचेर नियंत्रण मेळयत ह्या घरांतलो कांय म्हालवज वाटायलो. गॅस सिलिंडर भायर काडटना सुभाष बोरकार हे घर धनी किरकोळ जखमी जाले.
ही दुर्दैवी घडणूक बुधवारा सांजवेळा 7.30 वरांच्या सुमाराक घडली. हें घर बोरकार कुटुंबाचे आसून मनोहर बोरकार आनी सुभाष बोरकार हे दोग भाव घराच्या दोन भागांनी रावतात. ह्या उज्यांत मनोहर बोरकार हांच्या घराचो भाग पुरायेन जळून गेलो. जाल्यार सुभाष बोरकार हांची रांदची कूड सोडून हेर घराचें लुकसाण जालें.
उज्यांत मनोहर बोरकार कुटुंबांची आलमार, फ्रीज आनी हेर घरगुती वस्तू, कपडे, चार कुडींचें नळ्याचें पाखें जळून गोबर जालें. तशेंच आलमारींत आशिल्लें भांगर आनी रोख रक्कम लेगीत जळून गेली. ताका लागून तांचे लाखांनी रुपयांचें लुकसाण जालां.
जाल्यार सुभाष बोरकार हांच्या घरांतल्यो घरगुती वस्तू, नळ्याचे पाखें, खाट आनी हेर वस्तू जळिल्ल्यान तांचेंय मोटें लुकसाण जालां. हो उजो लागलो तेन्ना मनोहर बोरकार हांचे कुटूंब घरांत नाशिल्लें. घरांत कोणूच नाशिल्ल्यान उज्यान पेट घेतलो.
घराक उजो लागिल्ल्याचें समजतकूच सुभाष बोरकार हांणी घरांतलो गॅस सिलिंडर भायर काडलो. ह्या यत्नांत तांच्या हाताची बोटां भाजलीं. तशेंच घराक लागिल्लो उजो पळोवन तांचे घरकान्नीकूय अस्वस्थ दिसूंक लागलें. 108 एम्बुलन्सींतल्या कर्मचाऱ्यांनी तांचेर मुळावे उपचार केले. हो उजो लागपा फाटलें नेमकें कारण मात स्पश्ट जाल्लें ना.
उजो पालोवपी दळाचे हवालदार सुरज शेटगांवकार हांच्या फुडारपणा खाला गोविंद देसाय, शिवाजी राव राणे, विष्णू केसरकार, प्रवीण नायक गांवकार, आकाश कळंगूटकार, प्रशांत सावंत, निलेश गावडे, गणेश नायक, विजय गांवस, सचीन गांवकार आनी महेश कोरगांवकार ह्या म्हापशें आनी पर्वरी उजो पालोवपी दळाच्या जवानांनी हो उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
