पाकिस्तानी क्रिस्तांव व्यक्तीक सीएए खाला दिलें भारतीय नागरीकत्व
भांगरभूंय | प्रतिनिधी
गोंयांत सीएए खाला दिल्लें हें पयलें नागरीकत्व
पणजी ः पाकिस्तानी नागरीक आशिल्ल्या मूळ गोंयकार क्रिस्तांव व्यक्तीन सीएए खाला भारतीय नागरीकत्व मेळोवपा खातीर केल्लो अर्ज सरकारान मंजूर केला. आयज सीएए खाला मुख्यमंत्री डॉ. प्रमोद सावंत हांचे हस्तुकीं कांसावलेचे जोसेफ फ्रान्सीस परेरा हांकां भारतीय नागरीकत्व प्रमाणपत्र दिलें. गोंयांत सीएए खाला दिल्लें हें पयलें नागरीकत्व.
मेळिल्ले म्हायती प्रमाण, तो पुर्तुगेज काळांत गोंयांत जल्मल्लो. गोंय मुक्त जावचे पयलीं तो पाकिस्तानांत स्थलांतरीत जालो. उपरांत तांणे गोंयचे एके बायले कडेन लग्न केले आनी परत गोंयांत आयलो. सध्या तो घरकान्नी वांगडा कासावले रावता. कांय काळा पयलीं ताणें भारतीय नागरीकत्व मेळोवपा खातीर ऑनलायन अर्ज केल्लो. ताणें सादर केल्ल्या सगळ्या कागदपत्रांची तपासणी चार वांगड्यांची समितीन केल्ली. ते उपरांत समितीन केंद्रीय गृह मंत्रालयाक हे व्यक्तीक भारतीय नागरीकत्व परतून मेळोवन दिवपाची शिफारस केली. सगळी प्रक्रिया पुराय जाले उपरांत आयज तांकां मुख्यमंत्री हस्तुकीं भारतीय नागरीकत्व दिलें.
भारतीय नागरीकत्व मेळ्ळें उपरांत जोसेफ फ्रान्सीस परेरा हांणी सांगलें, हांव फाटलीं ११ वर्सां भारतीय नागरिकत्व मेळोवपाक यत्न करतालों. तांतूत जायत्यो अडचणी आयल्यो. पूण अखेरेक प्रधानमंत्री नरेंद्र मोदी आनी गृहमंत्री अमित शहा हांकां लागून म्हजें सपन साकार जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
