भांगरभूंय | प्रतिनिधी
भांगरभूंय । प्रतिनिधी
दिवचलःस्मृतीगंध भाईचा, उत्सव खेळ, शिक्षण संस्कृती मंडळान आयोजीत केल्ले सर्गेस्त पांडुरंग दत्ताराम राऊत यादस्तीक दुसऱे गोंय पांवड्या वयले शालेय लोकनाच सर्तींत अस्नोडें हांगच्या के बी हेडगेवार माध्यमीक विद्यालयान धालो सादर करून पयलें इनाम मेळयलें. म्हापशेंच्या गणेश विद्यामंदीराच्या मोरूलो नाचाक दुसरें आनी मेणकुरेंच्या सरकारी माध्यमीक विद्यालयाच्या चपय नाचाक तिसरें इनाम फावो जालें.
दिवचलच्या शांतादुर्गा माध्यमीक विद्यालयाच्या गोंधळ आनी कासारपालच्या सरकारी माध्यमक विद्यालयाच्या कळशी नाचाक उमेद वाडोवपी इनामां दिलीं. हे लोकनाच सर्तींत वांटेकार जाल्ल्या सेंट क्लारा हायस्कूल- अस्नोडें (पोंगल), सरकारी हायस्कूल- शिरगांव (फुगडी ),श्रीमती हायस्कूल – वेळगें ( कुणबी नाच), सरकारी हायस्कूल – हणखणे -पेडणे (दिवली नाच), महामाया हायस्कूल – मयें (कळशी नाच ), शिवाजीराजे माध्यमीक विद्यालय – खोलपेवाडी साळ ( कोळी नाच ) तशेंच आयडियल हायस्कूल – पिळगाव (गोफ ) ह्या हायस्कूलाच्या पंगडांक मानेस्ताचें हस्तुकीं यादस्तिकां भेटयलीं. सर्तीचें परिक्षण योगिता लांजेकार आनी प्रेरणा पालयेकार हांणी केलें.
पांडुरंग ऊर्फ भाऊ राऊत हाणी कला आनी संस्कृती मंत्री म्हणून काम करतना गोंयचे लोककलेक माची मेळोवन दिवंन तिचे संवर्धना खातीर उर्बां दिली. पर्यटन मंत्री ह्या नात्यान ताणी गोंयच्या लोककलेचो पंगड सिंगापूर आनी मलेशियांत धाडलो. ताची पुराय जापसालदारी म्हजे दिली. पांडुरंग राऊत हें कलाकारांक उर्बां दिवपी व्यक्तिमत्व आशिल्लें अशें नामनेचो लोक कलाकार कांता गांवडे हाणे सर्तीच्या समारोपा वेळार सांगलें.
इनाम भेटवण कार्यावळीक ज्ञानप्रकाश मंडळाची अध्यक्ष प्रिया राऊत, ज्ञानप्रकाश माध्यमीक विद्यालयाच्या पालक-शिक्षक संघाचो अध्यक्ष बाबाजी देसाय, भगवान गांवस, पौर्णिमा केरकार हाजीर आशिल्ली. सकाळच्या सत्रांत सर्तीचें रोहिदास पळ हाचे हस्तुकीं सर्तीचें उक्तावण जालें. सुरवेक पौर्णिमा केरकार बरयल्ल्या आनी स्नेहा सुताराक संगीत दिल्ल्या येवकार गीत शिक्षक वर्गान सादर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
