भांगरभूंय | प्रतिनिधी
पणजी : राज्यांत अपघाती सत्रांक आजूनय ब्रेक लागूंक ना, अंदूं १ जानेवारी ते ३१ मे ह्या पांच म्हयन्यांच्या काळांत १,०९४ रस्ते अपघात जाले. ह्या अपघातांनी ११२ जाणांक आपलो जीव वगडावचो पडलो. चिंता करपा सारकी गजाल म्हळ्यार, मरण आयिल्ल्यां मदीं सगल्यांत चड ७३.२१ टक्के म्हळ्यार ८२ जाण दुचाकीचालक आनी तांचे फाटल्यान बशिल्ले प्रवासी आसात.
अपघाती मरणां टाळपा खातीर येरादारींत शिस्त आसप सामकें म्हत्वाचें. हे खातीर येरादारी पुलीस विभाग, थळावे पुलीस आनी येरादारी खात्या वतीन विवीध उपक्रम आनी जनजागृती मोहिमो राबयतात, तरीय राज्यांतल्या अपघातांच्या सत्रांत वाड जाता.
आंकडेवारी प्रमाण, २०२५त पयल्या पांच म्हयन्यांत १,०१७ अपघात जाल्ले. जाल्यार अंदूं (२०२६) ह्याच काळांत १,०९४ अपघात जाल्यात. हाचो अर्थ फाटल्या वर्साचे तुळेंत अंदूं ७७ अपघात चड जाल्यात, अपघातांचें प्रमाण ७.५७ टक्क्यांनी वाडलां. दुसरे कडेन फाटल्या वर्सा ह्याच काळांत ११८ जाणांक मरण आयिल्लें. जाल्यार अंदूं ११२ जाणांक मरण आयलां. हाका लागून अपघातांत मरण येवपाचें प्रमाण ५.०८ टक्क्यांनी मत्शें देंविल्ल्याचें नोंद केलां.
अंदूं दुचाकी चालकांचीं मरणां सगल्यांत चड
अंदुच्या पांच म्हयन्यांत घडिल्ल्या १,०९४ अपघातां मदले १०८ अपघात हे भिरांकूळ स्वरुपाचे आशिल्ले. हातूंत मरण आयिल्ल्या ११२ जाणां मदले ६३.३९ टक्के म्हळ्यार ७१ दुचाकी चालक आसात. तशेंच दुचाकीचेर फाटल्यान बशिल्ले ११ जाण, १३ चलून वचपी, ८ चालक, ६ प्रवासी, १ सायकलीवेल्यान वचपी आनी हेर दोगांक मरण आयलां. रस्त्यांचेर वाहनांच्या धपक्यांत १३ चलूच वतल्यांक मरण आयिल्ल्यान राज्यांत आतां चलूच वचपूय धोक्याचें जाल्ल्याचें ह्या आंकड्यांवेल्यान समजता.
फाटल्या वर्साची स्थिती : २०२५ वर्सा ह्याच काळांत घडिल्ल्या १,०१७ अपघातां मदले ११५ भिरांकूळ आपघात आशिल्ले, जातूंत ११८ जाणांचो जीव गेला. तेन्ना मरण आयिल्ल्यां मदीं ५९.३२ टक्के म्हळ्यार ७० दुचाकी चालक आशिल्ले. तशेंच २३ चलत वचपी, दुचाकीचेर फाटल्यान बशिल्ले १५ जाण, ४ प्रवासी, ३ चालक आनी हेर दोगांचो आसपाव आसा.
दुखापती आनी वाहनांचें लुकसाण
अंदुच्या पांच म्हयन्यांत घडिल्ल्या १०७ अपघातांत १३८ जाणांक गंभीर दुखापत जाल्या, जाल्यार २३८ बारीक अपघातांत ३९८ जाणांक बारीक दुखापती जाल्यात. तशेंच ६४१ वाहनांचें व्हड लुकसाण जालां. २०२५त ह्याच काळांत ९० अपघातांत ११० जणांक गंभीर, जाल्यार २०५ अपघातांत ३२६ जाणांक बारीक दुखापती जाल्ल्यो; तशेंच ६०७ वाहनांचें व्हड लुकसाण जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
