भांगरभूंय | प्रतिनिधी
पणजीः गोंय राज्यांत राष्ट्रीय पशु रोग नियंत्रण कार्यावळी चालीक लायतले. हे कार्यावळी खाला जनावारांक जावपी संसर्गजन्य दुयेंसांच्या निर्मुलना खातीर ३१ दिसाच्या काळा खातीर वासनीकरण मोहीम हातांत घेतले. पोशिल्ल्या सयत रस्ताद जनावारांक हे मोहीमेचो लाव मेळटलो, अशी म्हायती पशुवैजकी खात्यान दिल्या.
पशुपालन आनी पशुवैजकी सेवा संचालनालय भारत सरकाराचे राष्ट्रीय पशु रोग नियंत्रण कार्यावळी खाला तोंड आनी पांयखुरी दुयेंस नियंत्रण ही येवजण आठवे खेप राबयता. तोंडखुरी आनी पांयखुरी हो एक संसर्गजन्य रोग आसून, ताचें निर्मूलन करपा खातीर वासनीकरण करतले. ह्या रोगाक लागून दूद उत्पादन, जनावरांची ओडपाची तांक, वाड आनी प्रजनन हाचेर वायट परिणाम जावन अर्थीक लुकसाण सोसचें पडटा.
ही ३१ दिसांची कार्यावळ ०४ मे २०२६ सावन सुरू जातली, जंय पाळीव जनावरां वांगडाच रस्ताद जनावरांकय लसीकरण करपाचे सगळे यत्न करतले. भारत सरकारान वळेरेंत दिल्ल्या कांय वेंचून काडिल्ल्या गांवांतल्यान लसीकरणा आदीं आनी उपरांत रक्ताचे नमुने एकठांय करतले, जाका लागून जनावरांचे रोगप्रतिकार शक्तीची स्थिती कळपाक मजत जातली. मार्गदर्शक तत्वां प्रमाण, वासीनीकरण केल्ल्या सगल्या जनावरांक वळखी खातीर कानाक ‘इअर टॅग’ लावप सक्तीचें आसा आनी त्या जनावरांची पुराय म्हायती ‘भारत पशुधन ऍप’ चेर अपलोड करप गरजेचें आसा.
सगळ्या दूद उत्पादक, शेतकामत्यांनी विभागाच्या वासीनीकरण पंगडाक आनी कर्मचार्यांक पुराय सहकार्य दिवचें, अशो उलो खात्यान मारला.
#Animal #Goa #Vaccination
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
