भांगरभूंय | प्रतिनिधी
पुलिसां कडल्यान मार्गदर्शक तत्वां जारी
पणजी : सेंट फ्रान्सीस झेवीयर पवित्र कूड दर्शन सुवाळो फाल्यां बिरेस्तारा सावन सुरू जाता. सुरक्षा उपाय येवजणेचो भाग म्हणून पुलिसांनी चर्चीच्या सहकार्यान भावीक तशेंच पर्यटकां खातीर सल्ले (मार्गदर्शक तत्वां) जारी केल्यांत. चर्चीत मोबायल व्हरपाक मेळटलो, मात तो बंद दवरचो (स्वीच ऑफ) पडटलो. व्हडलीं बँगा व्हरपाचेरूय बंदी आसतली. पुलीस अधीक्षक अक्षत कौशल हांणी ही म्हायती दिली.
वाठाराचेर नदर दवरपा खातीर ४०० परस चड सीसीटीव्ही कॅमेर्यांची वेवस्था केल्या. हे भायर मेटल डिटेक्टर, वॉच टॉवर्सच्या आदारान सगळ्या घडणुकांचेर पुलीस नदर दवरतले, अशें कौशल हांणी सांगलें.
पुलीस अधीक्षक अक्षत कौशल हांणी पोरणें गोंय चर्च वाठाराची पळोवणी करून सुरक्षा वेवस्थेचो नियाळ घेतलो. २१ नोव्हेंबर ते ५ जानेवारी २०२५ मेरेन पवीत्र कूड दर्शन सुवाळो जातलो. कूड दर्शन सुवाळ्या खातीर भावीक तशेंच पर्यटक येवपाक सुरवात जाल्यात. हाका लागून पोरणें गोंय वाठारांत गर्दी वाडपाक लागल्या.
कूड दर्शन सुवाळ्या जारी केल्लीं मार्गदर्शक तत्वां
कूड दर्शन सुवाळ्या निमतान फाल्यां सकाळीं ९.३० वराचेर पयलें मिस जाले उपरांत धर्मीक पद्दतीन बँड वाजोवन सेंट फ्रान्सीस झेवीयराची पवित्र कूड कास्केड बॅसीलीका चर्ची सावन सी कॅथेड्रल चर्चींत व्हरतले. कांय मेजके फादर आनी बँड पंगड कास्केडी सयत आसतले. माध्यम प्रतिनिधींक पवित्र कुडी सयत वचपाक मेळचें ना, अशी म्हायती फादर हेन्री फाल्कांव हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
