भांगरभूंय | प्रतिनिधी
कार्यकर्त्यां सयत घेतल्यो कोनसो बसका
केपें: भाजपाच्यो दक्षीण गोंयच्यो उमेदवार पल्लवी धेंपो हांणी केपें मतदारसंघांत पालिका आनी पंचायत वाठारांनी दीसभर प्रचार करून कोनसो बसका घेतल्यो. ह्या वेळार आदले उपमुख्यमंत्री चंद्रकांत कवळेंकार हांचे सयत तांची घरकान्न, आनी सांगें मतदारसंघांतल्यान अपक्ष उमेदवार म्हूण वेंचणुकेक उबी राविल्ली सावित्री कवळेंकार हाजीर आशिल्ली.
सकाळीं अवेडें पंचायतींत बसका घेतले उपरांत केपें पालिका वाठारांत कट्टा आमोणा, शिरवय वाठारांत बसका जाल्यो. तशेंच धेंपो हांणी केपें बाजार आनी हेर वाठारांनी प्रचार केलो.
ह्या वेळार केपें पालिका वाठारांत जाल्ले कोनसो बसकेंत तांचे सयत आदले उपमुख्यमंत्री चद्रकांत कवळेंकार, सावित्री कवळेंकार, नगराध्यक्षा सुचिता शिरवयकार, जिल्हो पंचायतीचे उपाध्यक्ष खुशाली वेळीप, शाणू वेळीप, संजना वेळीप, नगरसेवक दयेश नायक, दिपाली नायक, अमोल काणेकार, चेतन हळदणकार, गणपत मोडक, प्रसाद फळदेसाय, राजीव सुखटणकर, संजय वेळीप आनी हेर मानेस्त हाजीर आशिल्ले.
सगल्यांक अपेक्षा आशिल्ली आनी उमेदवारी मेळ्ळी ना म्हणून मनांय दुखावलीं आसतलीं. पूण हें सगलें सोडून सगल्यांनी पक्षान दिल्ल्या उमेदवाराक तेंको दिवन वेंचून हाडचें. पक्षान सगलो विचार करून हो निर्णय घेतला. बायलांनी मुखार येवचें हे खातीर भाजपान देशभरांत संद दिल्या, आनी हेच हेतून पयेलच फावटी दक्षीण गोंयच्यान बायल मनशेक उमेदवारी दिल्या. धेंपो कुटूंब हें गोंयच्या विकासा खातीर व्हड योगदान दीत आसा. समाजीक, शिक्षण, खेळ तशेंच विवीध मळार तांचें मोटें योगदान आसा. आमची उमेदवार ही भायली नासून ती मडगांवची धूव आसा अशें चंद्रकांत कवळेंकार हांणी म्हणलें.
विधानसभे परस लोकसभेंत मतदान उणें जाता. ताका लागून सगल्यांनी मतदान करचें हे खातीर कार्यकर्त्यांनी फुडाकार घेवचो अशें आवाहन चंद्रकांत कवळेंकार हांणी केलें.
धेंपो कुटुंबान समाजीक, खेळ, शिक्षण तशेंच हेर मळार कार्य करीत आसतना केन्नाच भेदभाव केलो ना. सदांच गरजेवंतांक मजत केल्या. हांव सदांच लोकांची कामां करतना मन लावन काम करतलें. मोदी हांणी बायलांक उमेदवारी दिवन बायल मनशेचो मान राखला अशें पल्लवी धेंपो हांणी सांगलें.
उपरांत दीसभर केपें मतदारसंघांतल्या पंचायत वाठारांनी प्रचार आनी कोनसो बसका जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
