भांगरभूंय | प्रतिनिधी
रायबंदर सायबर गुन्यांव विभागांत कागाळ दाखल
पणजी, बातमीदार ः उद्देगपती श्रीनिवास धेंपे हांची घरकान्न पल्लवी धेंपे दक्षीण गोंयच्यान भाजपाची उमेदवार म्हणून वेंचणूक लडयतली. आतां तांचे विशीं गैरसमज पातळावपी खबरांचे स्क्रीनशॉट व्हॉट्सअॅपाचेर व्हायरल जावपाक लागल्यात अशें दिसून आयलां. ते विशीं व्ही. एस. धेंपे होल्डिंग्स प्रा.च्या अधिकृत प्रतिनिधी शर्मिला एस. प्रभू हांणी रायबंदर पुलिसांच्या सायबर गुन्यांव विभागांत त कागाळ दाखल केल्या.
वेंचणुके उपरांत ‘धेंपे आनी अदानी समुह एकठांय येवपाची अपेक्षा आसा’ अशी फेक न्यूज व्हॉट्सअॅपाचेर पातळत आसा. ते खबरां वांगडा भाजपा उमेदवार पल्लवी धेंपेचो फोटोय जोडला. खरें म्हणल्यार पल्लवी ह्या कंपनीच्या साबार संचालकां मदली एक संचालक आसा. देखून ही खबर सामकी फेक आसा. खबरांपत्रा प्रमाण कंपनीन अदानी गटाक असो खंयचेच कबलातीचो प्रस्ताव दिवंक ना. दोनूय कंपनीं मदीं कसलीच कबलात लेगीत जावंक ना. तशेंच दोनूय कंपनींनी खंयच्याच प्रकारच्या संयुक्त उपक्रमाची येवजण करपाचो विचारय केल्लो ना. तरी लेगीत हे प्रकरणांत बनावट संदेश तयार करुन गैरसमज पातळावप हें दुर्दैवी असो हे कागाळींत उल्लेख केला.
कागाळी प्रमाण सायबर गुन्यांव फांट्यान गरजेची कायदेशीर कारवाय करपाक सुरू केल्या अशें स्पश्ट केलां. देखून लोकांनी अशीं पोस्ट प्रसारीत करचीं न्हय अशी विनंती प्रभू हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
