भांगरभूंय | प्रतिनिधी
गोंयांतल्या 13 प्रकल्पां खातीर 2,228 कोटींच्या रस्ते प्रकल्पांक केंद्राची मंजुरी
भांगरभूंय । प्रतिनिधी
पणजीः केंद्रीय रस्ते आनी म्हामार्ग मंत्रालया कडल्यान गोंया खातीर 2,228 कोटींच्या रस्तो प्रकल्पांक मंजुरी दिल्या. पर्वरे 600 कोटींच्या उड्डाण पुला सयत 13 प्रकल्पांचो तातूंत आस्पाव आसा, अशी म्हायती मंत्रालयान गोंय भौशीक बांदकाम खात्याक दिल्या.
फाटल्या कांय वर्सां सावन राज्य सरकारा कडल्यान गोंयांतल्या मुळाव्या साधन सुविधांत वाड करपाचेर भर दिला. राज्यांतल्या रस्त्यांचें रुंदीकरण, दुरुस्ती तशेंच गरज थंय उड्डाण पूल बांदपा खातीर सरकारान केंद्र सरकारा कडेन निधीची मागणी केल्ली. ताची दखल घेवन केंद्रीय रस्ते आनी म्हामार्ग मंत्रालयान प्रलंबीत 13 प्रकल्पां खातीर 2,228 कोटींच्या निधीक मंजुरी दिल्या. ताका लागून फुडल्या कांय म्हयन्यांत ह्या प्रकल्पांची कार्यवाही सुरू जावपाची शक्यताय आसा. मजगतीं, पर्वरेच्या प्रस्तावीत उड्डाण पुलाक 2018 त थळाव्या लोकांनी व्हड प्रमाणांत हरकत घेतिल्ली. उड्डाण पूल ज्या वाठारांतल्यान वता त्या वाठारांत खूबशीं घरां, शाळा तशें हॉस्पिटलां आसात. ह्याच वाठारांत उड्डाण पुलाचें खांबे उबे रावतले. ताका लागून ताचो व्हड मार थळाव्या लोकांक बसपाक शकता. ताका लागून सरकारान तत्काळ पर्वरेच्या उड्डाण पुला विशीं फेरविचार करचो, अशी मागणीय त्या वेळार थळाव्या लोकांनी मुख्यमंत्री प्रमोद सावंत हांचे कडेन केल्ली. पूण तेन्नाचे भौशीक बांदकाम मंत्री सुदिन ढवळीकार हांणी त्या वेळार पर्वरी बाजार ते हावसींग बोर्ड मेरेन उड्डाण पूल बांदतले, अशें सांगिल्लें. ह्या कामाक सुमार 350 कोटी रुपया खर्च येतलो. ह्या कामांत कोणाचींच घरां, मालमत्ता वच्ची ना, अशेंय म्हणिल्लें. जाल्यार, ह्या स पदरी उड्डाण पुलाचें थळाव्यां मुखार सादरीकरण केलां. लोकांक विस्वासांत घेवनूच प्रकल्पाचें काम करतले, अशें तेन्नाचे महसूल मंत्री तशेंच पर्वरीचे आमदार रोहन खंवटे हांणी सांगिल्लें. पूण 2019 त रोहन खंवटे हांकां मंत्री पदा वयल्यान काडले उपरांत थळाव्यांनी ह्या प्रकल्पाक परतून खर विरोध केल्लो. पूम केंद्रान आतां हो प्रकल्प चालीक लावपाचें निश्चीत केलां.
मुख्यमंत्र्यान मानले मोदी, गडकरी हांचे उपकार
राज्यांतले विवीध रस्ते प्रकल्पां खातीर भौशीक बांदकाम खात्यान केंद्रीय रस्ते आनी म्हामार्ग मंत्रालया कडेन निधीची मागणी केल्ली. ताची दखल घेवन मंत्रालयान गोंयांतल्या विवीध प्रकल्पांच्या कामांक मंजुरी दिवन निधीची तजवीज केल्या. ताका लागून आपूण प्रधानमंत्री नरेंद्र मोदी आनी केंद्रीय मंत्री नितीन गडकरी हांचे उपकार मानता, अशी प्रतिक्रिया मुख्यमंत्री डॉ. प्रमोद सावंत हांणी पत्रकारां कडेन उलयतना उक्तायली.
मंजुरी दिल्ले म्हत्वाचे प्रकल्प, रुपया कोटींनी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
