भांगरभूंय | प्रतिनिधी
पणजी : पर्वरेच्या सुकूर पंचायत बागे लागसार १८ जुनाक जाल्ल्या मारपेट प्रकरणाक आतां धक्को दिवपी मोडण मेळ्ळां. ह्या हल्ल्यांत गंभीर जखमी जाल्लो आनंद पाटील हाका उपचारा मजगतीं आयज मरण आयलें. आदले दुस्मानकायेवेल्यान जाल्ल्या ह्या हल्ल्यांत पाटील हांच्या तोंडाक, तकलेक आनी शरिराच्या हेर भागांक गंभीर दुखापत जाल्ली. ह्या प्रकरणांत पर्वरी पुलिसांनी वेगान तपास करून २१ जुनाकूच तीन दुबावितांक अटक केल्ली. ह्या दुबावितां मदीं प्रणय बोरकार (२८), अर्जुन पार्सेकार (१८) आनी अनीश बोरकार हांचो आसपाव आशिल्लो. मात ह्या प्रकरणांतलो मुखेल आरोपी सुकूर हांगचो सौरभ नारुलकार हो फरारी आशिल्लो. ताका पुलिसांनी आयज अटक केली. ताका धरपा खातीर पुलिसांनी ’लुकआउट नोटीस’ जारी केल्ली.
हे विशीं पुलिसांनी दिल्ले म्हायती प्रमाण, हो हल्लो आदली झगडीं आनी वैयक्तीक वादाक लागून केल्लो. १८ जुनाक दुबावीतांच्या एका गटान आनंद पाटील हांकां धरून तांचेर हल्लो केल्लो. ह्या हल्ल्यांत तांचे तकलेक गंभीर दुखापत जाल्ली. तांकां रोखडेच हॉस्पिटलांत दाखल केल्ले थंय ते मरणा कडेन झुजताले. मात आयज उपचारा मजगतीं तांकां मरण आयलें. पाटील हांकां मरण आयिल्ल्या ह्या गुन्यांवाची खरसाण आनीक वाडल्या. पुलीस ह्या प्रकरणांत खुनाचें कलम जोडपाची शक्यताय आसा.
मजगतीं, पुलिसांनी ह्या प्रकरणांत वांटेकार आशिल्ल्या चवगांकूय अटक केल्या. हातुंतलो मुखेल दुबावीत सौरभ हो फरारी आशिल्लो. तो गोंयच्यान भायर पळून वचपाचे तयारेंत आशिल्ल्याची शक्यताय लक्षांत घेवन विमानतळ आनी सगल्या शिमांचेर शिटूक रावपाचे आदेश दिल्ले. ताचे आड लुकआवट नोटीस जारी केल्ली. पर्वरी पुलीस ताचो नेटान सोद घेताले. निमाणें ताचो सोद घेवपाक पुलिसांक येस आयले. निमाणें आयतारा पुलिसांनी ताका अटक केली.
आनंद पाटील हांच्या दुर्दैवी मरणा उपरांत आतां राजकी आनी समाजीक पांवड्यार खर प्रतिक्रिया येवपाक लागल्यात. सुकूर पंचायतीचे आदले सरपंच संदीप मांजरेकार हांणी सरळ थळाव्या पुलिसांचे भुमिकेचेर गंभीर प्रस्न हाजीर करून ह्या पुराय प्रकरणावेल्यान प्रशासनाक धारेर धरलां. मांजरेकर हांणी आरोप केला की, ह्या वाठारांत कायदो आनी सुवेवस्थेचो प्रस्न निर्माण जावचो न्हय म्हणून थळाव्यांनी पुलिसां कडेन गस्त वाडोवपाची मागणी केल्ली. इतलें न्हय तर, हे विशीं थळावे आमदार, मंत्री रोहन खंवटे आनी मुख्यमंत्री डॉ. प्रमोद सावंत हांचे कडेन दाद मागिल्ली. पुलिसांनी जर वेळार हे शिटकावणेची दखल घेवन योग्य ती कारवाय केल्ली जाल्यार आयज आनंद पाटील हांचेर हल्लो जावचो नाशिल्लो, असो दावो मांजरेकर हांणी केला.
आनंद पाटील हांच्या मरणान तांच्या कुटुंबाचेर दुख्खाचो दोंगर कोसळ्ळा. ह्या पिडेस्त कुटुंबाक न्याय मेळोवन दिवपा खातीर ह्या प्रकरणांत वाटेकार जाल्ल्या दुबावितांचेर बेगोबेग खुनाचो गुन्यांव नोंद करचो, अशी मागणी मांजरेकार हांणी केल्या. तशेंच पुलिसांनी कसल्याच चेंपणाक बळी पडनासतना आरोपींचेर खर कायदेशीर कारवाय करची, अशीय मागणी सध्या जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
