भांगरभूंय | प्रतिनिधी
भांगरभूंय । प्रतिनिधी
पर्वरीः अटल सेतूचे दुरुस्तीक लागून तो येरादारीक बंद केल्ल्यान सोमार सावन पर्वरी येरादारीची व्हडा प्रमाणांत कोयंडी जावपाक लागल्या. अटल सेतू वयलें काम 26 मार्च मेरेन चलतलें. ताका लागून तो मेरेन वाहन चालकांक मनस्ताप सोसचो पडटलो अशें दिसता.
मंगळाराक मांडवी पूल सर्कल तें सुकूर जंक्शन मेरेन वाहनांचो रांगो लागल्ल्यो. वाहनां कासवाचे गतींत फुडें सरकतालीं ऑफिसां सुटून घरा वचपी कर्मचारी तशेंच दुयेंतींक घेवन वचपी अॅम्बुलन्सीक येरादारीचें कोयंडीचो सामको त्रास जालो. हे कोयंडेक लागून खाजगी तशेंच सरकारी कर्मचारी सकाळीं ऑफिसांत वेळार पावले नात तशेंच सांजे घरा पावपाक तांका कळाव जालो. कसलेंच नियोजन करनास्तना अटल सेतू बंद केल्ल्यान प्रवासी आनी वाहन चालक सरकारी यंत्रणेक खेपतना दिसताले.
अटल सेतूचें पुराय काम जालें बगर सरकारान तो येरादारीक उक्तो करपाक जायनाशिल्लें. सरकाराच्या घाळपणाक लागून लोकांक सध्या त्रास काडचे पडटात अशें पर्वरेच्या आग्नेल परेरान सांगले. येरादारीचे कोयंडेक लागून पॅत्रोल आनी डिझेलाची नाशाडी जाता. सध्या विद्यार्थ्यांच्यो परिक्षा चलतात. मात येरादारीचे कोंयडेक लागून ताकां शाळेंत वेळार पावप शक्य ना. सरकारान अश्या वेळार अटल सेतू बंद करून व्हडली चूक केली अशें ताणे सांगलें.
येरादारीची सामकी कोयंडी जावपाक लागल्या अशें आमी आमच्या हेड ऑफिसाक कळयलां अशें पर्वरेच्या येरादारी पुलिसांनी सांगलें. पर्वरी येरादारीचेर नियंत्रण दवोरपाक पुलीस कमी पडपाक लागल्यान थंय आनीक 15 पुलिसांक धाडला. 37 येरादारी पुलीस मांडवी पूल ते सुकूर जंक्शना मेरेन येरादारी नियंत्रणाचें काम करतात. मात पणजी- म्हापशें मार्गार सकाळीं, दनपारां आनी सांजे वाहनाची वर्दळ आशिल्ल्यान तिचेर नियंत्रण दवरप सामकें कुस्तार जाता.
दिसाच्या वेळार एनएच 17 चेर अवजड वाहनांक बंदी घालची अशी सूचोवणी पर्वरी येरादारी पुलीस कक्षाक तांच्या हेड ऑफिसांक कळयल्लें. वाहनाक लागून म्हामार्ग ब्लॉक जाल्ल्यान वाहनां सर्व्हिस रोड आनी पर्वरीच्या अंतर्गत रस्त्यां वयल्यान व्हरपाक वाहन चालकांनी सुरवात केली. ताका लागून सगळे कडेन येरादारीच कोंयडी आनी गचमुड्डी जाली.
मालीम जेटी कडेन बॅरिकेड घालून बेती-वेरें हांगच्यान येवपी वाहनां पुलिसांनी आडायली. ताका लागून तांणी फेरीबोटींतल्यान तीं व्हरपाक सुरवात केली आनी फेरीबोटीचेर वाहनां आनी प्रवाशांची गर्दी जाली. पर्वरी, सांगोल्डें आनी मालीम हागां येरादारीची सामकी कोंयडी जाल्ली दिश्टी पडटाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
