भांगरभूंय | प्रतिनिधी
रोहन खंवटे : उत्तर गोंय जिल्होधिकाऱ्याची घेतली भेट
भांगरभूंय । प्रतिनिधी
पणजी : पर्वरी मतदारसंघांतल्या ‘म्हजें घर’ येवजणेच्या अर्जाक गती दिवप, म्हजें घर येवजण ही घराघरांनी पावोवप आनी लोकांक समजपाक खंय त्रास जाता ताचेर एक जागृती कार्यावळ घडोवन हाडून तांचे विशय समजावन घेवन ताचेर उपाय काडपाक जाय. ह्यो गजाली जिल्होधिकाऱ्या वांगडा जाल्ले बसकेंत सुनिश्चीत करपा विशीं चर्चा जाली, अशी म्हायती पर्यटन मंत्री आनी पर्वरीचे आमदरा रोहन खंवटे हांणी दिली.
पर्वरी मतदारसंघांत म्हजें घर येवजणेचे अंमलबजावणीचो नियाळ घेवपा खातीर खंवटे हांणी उत्तर गोंया जिल्होधिकारी अंकीत यादव हांची भेट घेतली. भेटी उपरांत उलयतना खंवटे हांणी सांगलें 20 पॉयंट प्रॉग्राम, कम्युनिदाद आनी कांय सरकारी जमीन घरां नियमीत करपा बाबतींत ते जिल्होधिकाऱ्यांक विचारपाक आयिल्ले.
20 पॉयंट प्रॉगामाचे लाभार्थी हे सारके बारीक लोक आनी ह्या प्रकरणांक गती दिवपाक जाय. कांय जाणांचेर अजून केसी चालू आसात, कांय जाण न्यायाची वाट पळयतात आनी कांय घरां नियमीत जाल्यात. हो विशय हांवेंच मुख्यमंत्र्या कडेन मांडिल्लो. जातूंत हांवें 20 पॉयंट प्रॉग्रामा खातीर कायदो ककपाक तांकां मजत केल्ली, अशें खंवटे हांणी सांगलें.
20 पॉयंट प्रॉग्राम हो आमचो मुखेल विशय आसा आनी आमचे दोन वाठार, संजय नगर साल्वादोर दी मुंद आनी सुकूर हांच्यो कांय फायली म्हापशें आनी कांय फायली पणजे आसात. लोकां मदीं आमकां जागृताय वाडोवची पडटली आनी जे प्रस्न येतात ते एके माचेयर हाडून तांकां मजत करची पडटली, अशें खंवटे हांणी सांगलें. म्हजें घर येवजण खूबश्या लोकांक थाकाय दिवपी आसा. पूण निमाणी सनद मेळ्ळे उपरांतूच तांकां ही थाकाय मेळटा. 20 पॉयंट प्रॉग्रामा खाला फक्त जमनी खातीरूच तांकां सनद मेळटा. पूण तें बांदकाम कायदेशीर करचे खातीर अनियमीत बांदकाम नियमन कायदो (रुका) खाला तांकां अर्ज पडटात. हो कायदो मात्सो सुटसुटीत करून जे सर्वसामान्य लोक आसात तांकां वांगडा घेवन ही निमाणी प्रक्रिया करून दिवपाक जाय, अशी मागणी खंवटे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
