पर्वरे झाडां मारिल्ल्या प्रकरणांत दोगांक अटक

टॅम्पो सयत जप्त केल्लीं सायल्याचीं तोडां.

भांगरभूंय | प्रतिनिधी

म्हापशें: मायना सुकूर वाठारांत बेकायदो तरेन सायल्याचीं तीन झाडां मारून ताचीं तोडां व्हरपी ट्रक पर्वरी पुलिसांनी धरलो आनी दोगांक अटक केली.

अटक केल्ल्या दुबावितां मदीं बाबुराव सीताराम हळणकार (मायना सुकूर) आनी आंतानियो बेनेडिटो फर्नांडीस (सांताक्रूझ, तिसवाडी) हांचो आस्पाव आसा.

पुलिसांनी दिल्ले म्हायती प्रमाण मायना वाठारांत तीन सायल्याचीं झाडां मारल्यांत, आनी ताची टॅम्पोंतल्यान येरादारी करतात, अशी म्हायती पुलिशेक मेळिल्ली. ते प्रमाण पुलीस घडणुकेचे सुवातेर गेले. तेन्ना जीए 07 एफ 5073 नंबराच्या टॅम्पोंत सायल्याचीं तोडां भरताले. पुलिसांनी त्या टॅम्पो सयत टॅम्पोंतल्या दोगां दुबावितांक ताब्यांत घेतले. जप्त केल्ल्या सायल्याच्या तोडांचें मोल सुमार 3 लाख रुपया आसा.

पुलिसांनी दुबावितां आड झाड संरक्षण कायद्याच्या विवीध कलमां खाला गुन्यांव नोंद करून अटक केली. पुलीस निरिक्षक अनंत गांवकार हांच्या मार्गदर्शना खाला उपनिरिक्षक संकेत तळकार आनी सहाय्यक उपनिरिक्षक संजीव साळुंके हांणी ही कामगिरी केली.