भांगरभूंय | प्रतिनिधी
म्हापशें, प्रतिनिधी ः तीन बिल्डींग, पर्वरे ट्रकान दुचाकीक धपको दिल्ल्यान ट्रका पोंदाक चिड्डून विजया मुरगांवकार (४५, रा. चिंबल) हे बायलेक मरण आयलें. जाल्यार दुचाकी चालक हिरालाल मुरगांवकार (५५) हे जखमी जाले.
हो अपघात सोमारा २१ ऑक्टोबराक सकाळच्या ९.१५ वरांचेर घडलो. जखमी हिरालाल हे आपले भावजयेक घेवन जीए ०७ व्ही ५२०५ क्रमांकाचे ऍक्सेस स्कुटरी वेल्यान पणजेच्यान म्हापशेंचे दिकेन वताले.जाल्यार तेच वटेन मोहम्मद अफजल हो जीए ०५ टी ७९७९ क्रमांकाचो ट्रक घेवन वतालो. हीं दोनूय वाहनां घडणुके सुवातेर आशिल्ल्या नवरत्न रेस्टॉरन्टा लागसारा पावलीं तेन्ना ट्रकान दुचाकीक धपको दिलो. ताका लागून दुचाकी चालकाचें नियंत्रण गेलें. त्याच वेळार फाटल्यान बशिल्ली विजया ही ट्रका पोंदाक पडली आनी तिचे वेल्यान ट्रकाचे टायर गेले. गंभीर जखमी विजया हिका जीएमसींत व्हेली तेन्ना दोतोरांनी तिका मरण आयिल्ल्याचें सांगलें.
अपघाता वेळार दुचाकी चलोवपी रस्त्याचे उजवे वटेन पडून जखमी जालो.
अपघाताची म्हायती मेळटांच पर्वरे पुलीस घडणुके सुवातेर पावले. उपनिरीक्षक अरूण शिरोडकार आनी हवालदार विशाल गांवस हांणी पंचनामो केलो. पुलिसांनी ट्रक चालकाक ताब्यांत घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
