भांगरभूंय | प्रतिनिधी
पर्वरी : एका काळार फकत दादलेच घुमट आरत्यो करताले. मात, आतां तो काळ उरूंक ना. आतां बायलोय मुखार सरून घुमट आरती सर्तींनी वांटेकार जातात आनी इनामांय जोडटात. होच आमचो अभिमान. हाका लागून पर्वरेकार खंयच उणे नात हें हांव अभिमानान सांगपाक शकतां, अशें म्हायती आनी तंत्रज्ञान मंत्री तशेंच पर्वरीचे आमदार रोहन खंवटे हांणी सांगलें.
गणपती कला आनी सांस्कृतीक संघ, तोर्ड- पैठणच्या ‘घुमट गणपर्व’ ह्या बायलां घुमट आरती पॅनड्रायव्हाचें मंत्री रोहन खंवटे हांचे हस्तुकीं उक्तावण जालें. हो बायलांच्या घुमट आरत्यांचो पयलोच पॅनड्रायव्ह, जाचें सुकूर गांवांत लोकार्पण जालें. ह्या वेळार ते मुखेल सोयरे ह्या नात्यान उलयताले. मंत्र्या सयत माचयेर पंच वांगडी संदीप साळगांवकार, पेन्हा दे फ्रान्का सरपंच स्वप्नील चोडणकार, पंच वांगडी विजय दळवी, दत्ताराम रेडकार, गणपती कला आनी सांस्कृतीक संघाचे उपाध्यक्ष तुषार नायक आनी भांडारी दिपेश कळंगूटकार हजर आशिल्ले.
आयची पिळगी भायले संस्कृताये कडेन वळत चल्ल्या. तेन्ना तांकां आमचे संस्कृतायेची वळख करून दिवप गरजेचें. तांकां योग्य दिका दाखोवपाची गरज आसा अशें म्हणून मंत्री खंवटे हांणी ‘घुमट गणपर्व’ ह्या गोंयच्या पयल्याच महिला घुमट आरती पॅनड्रायव्हाचो लोकार्पण सुवाळो आयोजीत करपाचीं आनी गणपती कला आनी संस्कृती संघाच्या ह्या येसा खातीर परबीं भेटयलीं. तशेंच सगळ्यांनी हो पॅनड्रायव्ह विकत घेवचो असो उलो मारलो.
ह्या वेळार पंच वांगडी संदीप साळगांवकार, विजय दळवी आनी दत्ताराम रेडकार हांणी आपले विचार मांडले. तशेंच गणपती कला आनी संस्कृती संघाचे अध्यक्ष सागर नायक हांणी संघाची स्थापणूक ते ‘घुमट गणपर्व’ मेरेनच्या प्रवासाची म्हायती दिली. कार्यावळीचें सुत्रसंचालन समृद्धी गणपुले हाणें केलें. हे कार्यावळीक व्हडा संख्येन लोक हाजीर आशिल्ले. ह्या १२ आरत्यांच्या ‘घुमट गणपर्व’ पॅनड्रायव्हांत बारा ट्रॅक आसात. चवथीचे हे घडयेर तुमकां ह्या आरतींचो आस्वाद घेवपाक जाय जाल्यार हो पॅनड्राव्ह विकत घेवपा खातीर ९३७०२५०५११/८८३०२१२८१४ ह्या क्रमांकांचेर संपर्क करात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
