भांगरभूंय | प्रतिनिधी
भांगरभूंय । प्रतिनिधी
पर्वरीः पर्वरी हांगा सुमार 5.78 कोटी रुपये खर्च करून बांदिल्ली 650 घनमीटर तांकीची टाकी आनी 1 हजार घनमीटर ताकीच्या सम्प टाकयेचें उक्तावण बांदकाम मंत्री नीलेश काब्राल हांचे हस्तुकीं जालें. पर्वरी मतदारसंघांतलो उदका पुरवणेचो प्रश्न सासणाचो सुटावो करपा खातीर पुंडलीक नगर, जेएमसी हॉस्पिटल, 20 कलमी कार्यावळ वसाहन, सुकूर आनी साल्वादोर द मूंद मेळून आनीक पांच टाकयो बांदपाचो प्रस्ताव आसा अशें तांणी उक्तावण कार्यावळी वेळार सांगलें.
गौरी पॅत्रोल पंप ते गिरी मेरेनच्या फ्लाय ओव्हराचें काम रोखडेंच सुरू करतले अशी म्हायती काब्राल हांणी दिली. पर्वरेच्या कांय लोकांनी ह्या प्रकल्पाक विरोध करपी याचिका सर्वोच्च न्यायालयांत केल्ल्यान तो बरोच तेप प्रलंबीत आशिल्लो. न्यायालयान ही याचिका भायरायल्ल्यान आतां काम सुरू जातलें. ताचे पयली पंचायत आनी पर्वरेंतल्या लोकांक प्रकल्पाची पुराय म्हायती दिवन तांचे कडल्यान सूचोवण्यो मागयतले अशे तांणी सांगलें.
अस्नोडा उदका प्रकल्पांतल्यान येवपी पायपलायनीच्या निमण्या तोकार पर्वरी आशिल्ल्यान फाटल्या कांय वर्सां सावन पुराय मतदारसंघात उदका पुरवणेची समस्या आशिल्ली. ताचे उपाय येवजण म्हणून 15 एमएलडी ताकीचो उदका शुद्धिकरण प्रकल्प बांदला. तिळारी थरणाचें उदक ह्या प्रकल्पा खातीर हाडटात. मात नोव्हेंबर- डिसेंबर म्हयन्यांत देखभाल करपा खातीर तिळारींतल्यान उदक सोडनात. ताका लागून हो प्रकल्प चलना. साळ आनी आमठाणे हांगच्यान उदक हाडपा खातीर साळ ते पर्वरी अशी नवी पायपलायन घालतले अशें पर्वरीचो आमदार आनी पर्यटन मंत्री रोहन खवंटे हांणी सांगलें.
पर्वरी उदक शुद्धिकरण प्रकल्पांत सद्या 10 एमएलडी उदकाचेर प्रक्रिया करतात. नवे टाकयेंतल्यान उदक मेळटलें आनी ही तांक 15 एमएलडी मेरेन व्हरप शक्य जातलें. ताका लागून पर्वरी मतदारसंघात जाय त्या प्रमाणांत उदक मेळटलें, अशें बांदकाम खात्याचे मुख्य अभियंतो संतोष म्हापणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
