भांगरभूंय | प्रतिनिधी
म्हापशें, प्रतिनिधी ः पिळर्ण, पर्वरेच्या ऑडीट भवना कडेन रेहबर खुर्शिद अली खान (२१, रा. आल्त पर्वरी, मूळ उत्तर प्रदेश) हाची काल कूड सांपडिल्ली. रेहबर हाच्या खून प्रकरणांत पर्वरी पुलिसांनी आयज पांच जाणांक अटक केली. जाल्यार मुखेल दुबावीत विकास यादव हो फरारी आसा. रेहबर हाणें फरारी आरोपीचे इश्टीणी कडेन वळख वाडयिल्ली. कांय कारणांक लागून तिची सोशल मिडियाचेर बदनामी करपाची धमकी दिल्ली. ह्या रागान दुबावितांनी रेहबर हाचो खून केल्ल्याचें पुलीस चवकशेंतल्यान मुखार आयलां.
अटक केल्ल्या दुबावितां मदीं खतेश कांदोळकर (कांदोळे), सुमन बरीक (ओर्डा कांदोळे), सचिन सहानी (ओर्डा कांदोळे), तनय कांदोळकार (कांदोळे) आनी सचिन सिंग (कांदोळे) हांचो आसपाव आसा.
रेहबर खान हो पर्वरी चोघम रस्त्यार एका सलूनांत केंस कापपी म्हणून काम करतालो. ह्या सलुनाच्या शेजरा एक मिनी सुपरमार्केट आसा. त्या मार्केटाची धनिणी कडेन रेहबर खान हाची वळख जाल्ली आनी तो तिच्या एकतर्फी मोगांत पडिल्लो. ते तरणाटेची दुबावीत विकास यादव हाचे कडेन लागींची इश्टागत आशिल्ली.
ते तरणाटेचो रेहबर मानसीक छळ करपाक लागलो. ही गजाल तिणें आपलो इश्ट विकास यादव हाच्या कानार घाली. उपरांत विकासान कांय दिसां पयलीं रेहबर हाका मारबडय करून आपले इश्टीणीच्या लागीं वयचें न्हय अशी धमकी दिल्ली.
तरीय रेहबरान तें चालूच दवरिल्लें. आपल्या मेळपाक येना जाल्यार कपड्यां विणें फोटो मॉब करून सोशल मिडियाचेर घालपाची धमकीय रेहबरान ते तरणाटेक दिल्ली. रेहबर हांणी १५ तारखेक ते तरणाटेक आपले कुडीर येवपाक सागिल्लें. ही गजाल तरणाटेन आपल्या इश्टाक सांगली. ते प्रमाण रेहबर हाका रातचो धरून धडो शिकोवपाचें थारायलें. ते प्रमाण वयर नांवां दिल्ल्या सगळ्यांक दुबावीतांनी आपयलो. रुमाचेर वतना रेहबर हाका आरोपींनी धरलो आनी गाडयेंत घालून घडणुके सुवातेर हाडलो. थंय ताका थापटांनी, खोटांनी तशेंच दांड्यानी बरीच मार बडय करून जखमी अवस्थेंत थंयच उडोवन ते थंयच्यान गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
