भांगरभूंय | प्रतिनिधी
म्हापशें : हाउसिंग बोर्ड, पर्वरेचे आशा सप्रे हांच्या घराक उजो लागून ७ लाख रुपयांचें लुकसाण जालें. पर्वरे आनी पणजी उजो पालोवपी दळाच्या जवानांनी येवन वेळार उज्याचेर नियंत्रण मेळयिल्ले खातीर व्हड लुकसाण जावपा पसून वाटवलें.
ही घडणूक आयज दनपरां सुमार १.२० वरांचेर घडली. शॉर्ट सर्किटाक लागून हो उजो लागिल्ल्याचो दुबाव सप्रे कुटुंबियांनी उक्तायला.
घरांतलीं सगलीं जाणां तळ माळयेर आशिल्लीं तेन्ना पयले माळयेर हो उजो लागलो. घराक उजो लागतांच सप्रे कुटुंबियांनी उजो पालोवपी दळाक घडणुकेची म्हायती दिली. तेन्ना पर्वरे उजो पालोवपी दळान घडणुके सुवातेर धांव घेतली.हो उजो नियंत्रणा भायर पाविल्ल्यान पणजी उजो पालोवपी दळाकूय संपर्क केलो. पर्वरी उजो पालोवपी दळाचे अधिकारी यशवंत फडते हांच्या मार्गदर्शना खाला दोनूय दळाच्या जवानांनी उजयाचेर नियंत्रण हाडलें. हाका लागून हो उजो तळ माळयेर पावूंक ना.
ह्या उज्यांत पयले माळयेवेले चडश्या कुटींतलें सामान आनी नळ्यांचें पांखें लासून गेलें. हातूंत सुमार ७ लाख रुपयांचें लुकसाण जालें. पर्वरे पुलिसांनी हे घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
