भांगरभूंय | प्रतिनिधी
नाबार्ड आनी पर्यटन खात्यामदीं धोरण आखपाचेर निर्णय
पणजी, प्रतिनिधी ः गांवगिर्या पर्यटनाचेर भर दितना शेतकारांक शाश्वत उपजिविका दिवन तांचें उत्पन्न वाडोवपाचेर पर्यटन खातें लक्ष केंद्रीत करतलें. हें लक्ष साध्य करपा खातीर गांवगिर्या वाठारांत पायाभूत सुविधांची उदरगत करपाक धोरण तयार करपा खातीर पर्यटन खातें आनी शेतकी आनी ग्रामीण उदरगती खातीरची राष्ट्रीय बँक (नाबार्ड) हांचे मदीं निर्णय जालो.
नाबार्ड गोंय प्रादेशीक कार्यालयान मंगळारा प्रादेशीक सल्लागार समितीची बसका आफयल्ली. हे बसकेंत गोंयचें कृषी पर्यावरण पर्यटन तशेंच गांवगिर्या पर्यटनाच्या प्रचाराचेर खोलायेन चर्चा जाली. पर्यटन खात्याचे संचालक सुनील अंचिपाका हांच्या फुडारपणाखाला जाल्ले हे बसकेंत राज्यांतलें गांवगिरें पर्यटन चालीक लागपा खातीर कृती आराखडो तयार करपा विशीं धोरण तयार करपाचेर मुखेल भागधारकां वांगडा चर्चा केली.
नाबार्ड गोंयचे प्रादशीक अधिकारी संदीप धारकर, आयसीएआर-सीसीएआरआयचे संचालक डॉ. परवीन कुमार, गोवा चेंबर ऑफ कॉमर्स अँड इंडस्ट्रीचे कृषी समितीचे अध्यक्ष ओरलँडो रॉड्रिग्स आनी हेर अधिकारी हजर आशिल्ले. बसकेंत उलयतना पर्यटन खात्याचे संचालक सुनील अंचिपाका हांणी सांगलें, पर्यटन मळार चलपी उदरगत फक्त थळावे पर्यावरण आनी संस्कृतीचें रक्षण करना जाल्यार तांची वाड सुनिश्चीत करता.
सगळ्या विभागां मदीं समन्वय सादपा खातीर एकठांय येवन यत्न करपाची गरज आसा. गोंय राज्याक दर्या पल्तडची वळख दिवपा खातीर आपली सांस्कृतीक आनी अंतर्गत पर्यटन सेवा फुडें व्हरपाक आमी एकठांय येवन काम करपाक जाय. हो सर्वसमावेशक दृश्टिकोन त्या त्या वाठारांतलो मुळावो अणभव घेवपी इत्सूक पर्यटकांक आकर्शीत करतलो, अशें अंचिपाका हांणी सांगलें.
बसकेंत ह्या चार मुद्यांचो धोरणांत आसपाव करपाचेर चर्चा जाली. तातूंत थळाव्या समुदायांक सक्रीयपणान वाटेकार करून घेवन तांकां फायदो जावचो म्हण पर्यटन क्रियाकलापांत तांची भूमिका प्रखर करतले.
दर्यादेगां पसून पयस गेल्यार गोंय हें संस्कृतीक दायज आनी सैमान गिरेस्त आशिल्लें थळ म्हण ताची वळख निर्माण करप. संस्था, थळावे वेवसाय आनी स्वयंसेवी संस्थां खातीर भागीदारीक उर्बा दिवप. ग्रामीण पर्यटनाचे उदरगतीक घटसाण दिवपा खातीर समस्या सोदून थंयसर पांयांभूत सुविधा उबारप. सगळे पर्यटन उपक्रम पर्यावरणाच्या नदरेन शाश्वत आनी सांस्कृतीक नदरेन आदरणीय आसात हाची खात्री करप. शाश्वत उपजीविके वरवीं शेतकारांचें उत्पन्न वाडोवन शेतकारांक शाश्वत उत्पन्नांची खात्री दिवप हें सारकिल्ले निर्णय जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
