भांगरभूंय | प्रतिनिधी
मुख्यमंत्र्याची प्रधानमंत्र्या कडेन चर्चा
सीआरझॅड नेम सदळ करपाची मागणी
ऑक्टोबरांत पर्वरी उड्डाण पुलाचें उक्तावण
भांगरभूंय । प्रतिनिधी
पणजी : पर्यटना सयत गोंय हें पसंतीचें वेडींग डेस्टिनेशन उरपा खातीर आवाज प्रदुशण नेमात गोंयांक सूट मेळपाची मागणी मुख्यमंत्री डॉ. प्रमोद सावंत हांणी प्रधानमंत्री नरेंद्र मोदी हांचे कडेन केल्या. तरेकवार खात्यां कडेन समन्वय सादून कायद्यांत गरजेची दुरुस्ती करपाचें आस्वासन प्रधानमंत्र्यान दिल्ल्याचें मुख्यमंत्र्यान सांगलें. न्हंयांतली रेंव काडप शक्य जावचे म्हूण सीआरझॅड नेम गोंया खातीर सदळ करपाची मागणी केल्ल्याचें मुख्यमंत्र्यान सांगलें.
प्रधानमंत्र्या सयत हेर केंद्रीय मंत्र्यांची भेट घेवपाक मंगळारा रातीं दिल्ली गेल्ले मुख्यमंत्री डॉ. सावंत हे बिरेस्तारा गोंयांत पावले. गोंयांत पावले उपरांत दिल्लींत घेतिल्ल्यो भेटी तशेंच चर्चेची म्हायती तांणी पत्रकारांक दिली.
बुधवारा कुंटुंबा सयत मुख्यमंत्री डॉ. सावंत हांणी सेवा तीर्थाचेर प्रधानमंत्री नरेंद्र मोदी हांची भेट घेतली. ह्या वेळार आवाज प्रदुशण नेम आनी रेंवेच्या प्रस्नाचेर सविस्तरपणान चर्चा जाली.
गोंय हें नामनेचें पर्यटन थळ आसा. पर्यटन थळा सयत गोंयची वळख आतां वेडींग डेस्टिनेशन अशी जावपाक लागल्या. मात आवाज प्रदुशण नेमाक लागून हांगा रातच्या वेळार संगीत वाजोपाचेर निर्बंध आसात. हाका लागून लग्न सुवाळे तशेंच हेर पार्टी करतना पर्यटक वा हेरांक मजा करपाक मेळना. हाका लागून आतां लग्न सुवाळे जावपाचें प्रमाण उणें जावपाक लागलां. लग्न सुवाळ्या खातीर पर्यटक तशेंच हेर लोक विदेशाक पसंती दिवपाक लागल्यात. गोंय हें नामनेचे वेडींग डेस्टिनेशन उरचे म्हूण आवाज प्रदुशण नेमांत सूट मेळपाची गरज आसा. हे विशीं प्रधानमंत्री नरेंद्र मोदी हांचे कडेन आपणे चर्चा केली. रातचें संगीत वाजोवपाक सूट मेळची म्हूण आवाज प्रदुशण नेमांत गोंयां खातीर सूट दिवपाची मागणी केली. हे विशीं तरेकवार खात्यां कडेन समन्वय सादून फाटपुरवण करपाचे उतर प्रधानमंत्र्यान दिलां, अशें मुख्यमंत्र्यान सांगलें.
रेवें खातीर सीआरझॅड नेमांत सूट
सीआरझॅड नेमांत आशिल्ल्या निर्बंधांक लागून गोंयांत रेंव आसून लेगीत ती काडपाक मेळना. रेंव भायल्यान हाडची पडटा. रेंव काडप शक्य जावचें, म्हूण सीआरझॅड नेमात गोंया खातीर सदळसाण दिवपाची मागणी मुख्यमंत्र्यान केली. हो विशय तरेकवार खात्यां कडेन संबंदीत आसा. हे विशीं लेगीत फाटपुरवण करपाचें आस्वासन प्रधानमंत्र्यान दिलां.
रेंव काडपाचेर बंदी आशिल्ल्यान गोंयात बांदकाम वेवसायिकांक फटको बसता. भायल्यान रेंव हाडप म्हारग पडटा. हाका लागून रेंवेचे दर वाडून घर बांदपाचो खर्च वाडला. हाचेर उपाय म्हूण सीआरझॅड नेम सदळ करपाची मागणी मुख्यमंत्र्यान केली.
प्रधानमंत्र्याचे हस्तुकीं पर्वरी उड्डाण पुलाचें उक्तावण
पर्वरी उड्डाण पुलाचें काम सप्टेंबर, ऑक्टोबर मेरेन पुराय जातलें. पर्वरी उड्डाण पूल, कुणबी विलेज तशेंच हेर प्रकल्पांचें उक्तावण करपा खातीर प्रधानमंत्री नरेंद्र मोदी हे सप्टेंबर वा ऑक्टोबरांत गोंयाक भेट दितले. गोंय भेटीचें हांवें तांका निमंत्रण दिलां. ह्या वेळार हेर प्रकल्पांचो लेगीत बुन्यादी फातर घालपाचो वावर प्रधानमंत्र्यां हस्तुकीं जातलो, अशें मुख्यमंत्र्यान सांगलें.
गृहमंत्र्या कडेन राजकी स्थितीचेर चर्चा
गृहमंत्री अमीत शहा हांचे कडेन राजकी स्थिती तशेंच उदरगतीचेर चर्चा जाली. एसटी आरक्षणाची कार्यवाही बेगीन करपाची मागणी हांवें केली. अमीत शहा हे सहकार मंत्री लेगीत आसात. मुळाव्या शेतकी सोसायटींच्या स्थितीचेर चर्चा जाली. पक्ष कार्यालयाच्या उक्तावणा खातीर केंद्रीय गृहमंत्री अमीत शहा आनी राष्ट्रीय अध्यक्ष नितीन नबीन हे गोंयांत येतले, अशें मुख्यमंत्र्यान सांगलें.
आदले मुख्यमंत्री रवी नायक हांच्या मरणाक लागून मंत्रीमंडळांत एक सुवात रिती आसा. बेगिनूच नव्या मंत्र्याचो सोपूत सुवाळो जातलो, अशें मुख्यमंत्र्यान सांगलें. प्रधानमंत्री नरेंद्र मोदी हांणी म्हझो बापूय तशेंच कुटुंबा कडेन 25 मिनटां चर्चा केली. म्हज्या पप्पान जनसंघा वतीन समाजीक कार्य सुरू केल्लें. 1978 वर्साची वेंचणूक लेगीत म्हज्या पप्पान लडयल्ली. ह्यो सगळ्यो यादी पप्पान प्रधानमंत्र्यांक सांगल्यो. कुटुंबा सयत प्रधानमंत्र्यांची भेट घेवप हो म्हझे खातीर समाधानाचो खीण आशिल्लो, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
