भांगरभूंय | प्रतिनिधी
पणजी ः गोंयांतली विमान कंपनी फ्लाय 91 31 ऑगस्टा सावन गोंय ते पुणे आनी सिंधुदुर्ग ते पुणे ह्या मार्गांचेर थेट विमान सेवा सुरू करतली.
शेनवारा ते आयतारा मजगतीं गोंय- पुणे- गोंय मार्गाचेर दोन विमान सेवा चलतल्यो. विमान IC13769 (GOX-PNQ) गोंयच्या मनोहर आंतरराष्ट्रीय विमानतळा वयल्यान सकाळीं 06.35 वरांचेर सुटतलें आनी सकाळीं 07.40 वरांचेर पुणे आंतरराष्ट्रीय विमानतळार पावतलें. तेच प्रमाण IC1375 (PNQ-GOX) विमान पुणे आंतरराष्ट्रीय विमानतळा वयल्यान सकाळीं 10.55 वरांचेर सुटतले आनी सकाळीं 12.10 वरांचेर गोंयच्या मनोहर आंतरराष्ट्रीय विमानतळार पावतलें.
31 ऑगस्टा सावन फ्लाय 91 सप्तकाच्या शेवटाक सिंधुदुर्ग आनी पुणे हांकां जोडपी थेट विमान सेवा सुरू करतले. महाराष्ट्रांतल्या प्रादेशिक हवाई प्रवासाक ही व्हडली गजाल. विमान IC5302 (PNQ- SDW) पुणे विमानतळा वयल्यान सकाळीं 08.05 वरांचेर सुटतले आनी सकाळीं 09.10 वरांचेर सिंधुदुर्ग विमानतळार पावतलें. विमान IC5303 (SDW-PNQ) सिंधुदुर्ग विमानतळा वयल्यान सकाळीं 09.30 वरांचेर सुटतले आनी सकाळीं 10.35 वरांचेर पुणे विमानतळार पावतलें. शेनवार आनी आयतारा ह्यो दोनूय विमान सेवा चलतल्यो.
गोंय- पुणे- गोंय उड्डाण सेवेक लागून दोनूय थळांचेर पर्यटनाक चालना मेळटली. गोंयच्या सांस्कृतीक थळां आनी दर्यादेगांचेर पुणेकारांक भेट दिवप आतां सोंपें जातलें आनी गोंयच्या लोकांक पुण्यांतल्या सांस्कृतीक आनी तंत्रीक थळां कडेन सोंपेपणान पावपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
