भांगरभूंय | प्रतिनिधी
कळंगूट पुलिसांची पर्यटक टॅक्सीकारांक विनंती
म्हापशें: गोंयांत येवपी पर्यटकांक ‘अतिथी देवो भव’ म्हूण बरी वागूक दियात. वाद वा मारपेट करूं नाकात. जर एखादो पर्यटक सोऱ्याचे घुंवळेंत मस्ती करीत आसल्यार 112 ह्या टोल क्रमांकाचेर पुलिसां कडेन संपर्क सादात अशें आवाहन पुलीस उपअधिक्षक विश्वेश कर्पे आनी निरिक्षक परेश नायक हांणी कळंगूटेंतल्या पर्यटक टॅक्सीकारांक केलें.
हालींच कळंगूटे पुलीस स्टेशनाचे शिमेंत टॅक्सीकारां कडल्यान पर्यटकांक मारपेट करपाचो प्रकार घडिल्लो. हे फाटभुंयेर काल (शुक्रारा) कळंगूट पुलीस स्टेशनार टॅक्सीकारांची बसका घेतली. ह्या वेळार सुमार शंबर टॅक्सी चालक आनी धनी हाजीर आशिल्ले.
ह्या वेळार पुलीस उपअधिक्षक विश्वेश कर्पे आनी निरिक्षक परेश नायक हांणी ह्या बसकेच्या आयोजना फाटलो हेतू स्पश्ट केलो. पर्यटकांक लागून रोजगार चलता. ताका लागून तांकां बरी वागणूक दिवची. जेणे करून ते गोंया विशींचो अणभव आपल्या इश्टांक, सोयऱ्यांक सांगतले आनी हाका लागून पर्यटनांत वाड जातली.
कोणा कडेनूच वाद वा झगडीं करची न्हय. जर कोणूय सोऱ्याचे घुंवळेंत भाड्या वेल्यान वाद वा मस्ती करीत आसल्यार पुलिसांक आपयात. कोणेच कायदो हातांत घेवचो न्हय अशी विनंती पुलीस उपअधिक्षक विश्वेश कर्पे हांणी केली.
आमचे कडेन हालींच घडिल्ले घडणुकेचो व्हिडियो आसा. बायलां, भुरग्यांकूय मारपेट करतात. हो प्रकार योग्य न्हय. अशे प्रकार हाचे मुखार घडचे न्हय हीच आमची अपेक्षा आसा. ताका लागून टॅक्सीकारांनी सहनशीलताय दाखोवन पुलिसांक सहकार्य करचें अशें आवाहन पुलीस निरिक्षक परेश नायक हांणी केलें.
ह्या वेळार टॅक्सी धनयांचे वतीन बाप्पा कोरगांवकार आनी हेरांनी गोवा मायल्स तशेंच फ्लोटा मायल्साचो मुद्दो उपस्थीत केलो. आमी फाटलीं 30 वर्सां पर्यटक टॅक्सी वेवसाय करतात. पूण गोवा मायल्स येवचे पयलीं टॅक्सीकारांचेर कोणाचीच कागाळ नाशिल्ली. ताका लागून ह्या वेवसायांत कळीचो मुद्दो अॅप टॅक्सी होच आसा. आमी मिटर बसोवन वेवसाय करतात. पूण गोवा मायल्साक हो मिटर लागू जायना. सरकारा कडेन वेळावेळार आमी आमचो प्रस्न मांडपाचो यत्न केलो. पूण आमचे कागाळीं कडेन आडनदर केली. ताका लागून पुलिसांनी आतां हातूंत लक्ष घालून येरादारी खात्या बरोबर जोड बसका घेवची अशी मागणी टॅक्सीकारांनी केली.
गोवा मायल्साचो विशय हो येरादारी खात्या कडेन निगडीत आसा. संवादानूच एखाद्या विशयाचेर उपाय काडूं येता. ताका लागून टॅक्सीकारां बरोबर जोड बसका घेवची अशी विनंती येरादारी खात्या कडेन करतले अशें आस्वासन उपअधिक्षक विश्वेश कर्पे हांणी ह्या वेळार टॅक्सीकारांक दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
