भांगरभूंय | प्रतिनिधी
भांगरभूंय । खबरां मेज
पणजीः नामनेचे कोंकणी कवी आनी अणकारपी परेश नरेंद्र कामत हांच्या ‘चित्रलिपी’ कविता झेल्याच्या हिंदी अणकाराचें गोंयचे राज्यपाल पी. एस. श्रीधरन पिल्लई हांणी 3 एप्रिलाक राजभवनांत लोकार्पण केलें. हो झेलो नवी दिल्लीच्या साहित्य अकादेमी वतीन उजवाडायला. गोंय विद्यापिठाच्या शणै गोंयबाब भाशा आनी साहित्य संकायाचो युवा भाशाशास्त्रज्ञ, अणकारपी आनी सहायक प्राध्यापक आदित्य सिनाय भांगी हांणी हो अणकार केला.
राजभवनांत जाल्ले कार्यावळीक कवी परेश कामत आनी अणकारपी आदित्य सिनाय भांगी हाजीर आशिल्ले. राज्यपालान परेश आनी आदित्य हांकां शुभेत्सा दिवंन अणकार ही आयचे काळाची गरज अशें सांगलें आनी दोघांकुय फुडारांतल्या कामां खातीर शुभेत्सा दिल्यो तशेंच आपल्या पुस्तकाची प्रत परेश कामत हांकां भेट म्हणून दिली.
2018 वर्साचो प्रतिश्ठीत साहित्य अकादेमी पुरस्कार जैतिवंत कवी परेश कामत हांचे अळंग, गर्भखोल, शुभंकर, चित्रलिपी आनी रंगबोली अशे पांच कविता झेले उजवाडाक आयल्यात. तशेंच तांकां गोंय सरकारा कडल्यान राज्य पांवड्यावेले जायते पुरस्कार मेळ्ळ्यात. ताणीं साहित्य अकादेमी पुरस्कृत नामनेचो हिंदी कवी राजेश जोशी हांच्या ‘दो पंक्तियों के बीच’ हाचो कोंकणी अणकार केला. परेशाच्यो कोंकणी कविता हिंदी, मराठी, पंजाबी, गुजराती, ओडिया, काश्मीरी, आसामी, इंग्लीश आदी भाशांनी अणकारीत जाल्यात. ‘चित्रलिपी’ कविता झेल्याचें एक खाशेलेंपण म्हळ्यार चित्रां इतलीच दृश्टीन उमळशीक करपी ताची भास. उदक, बोट, काळोख, फांतोड, झाड, सुकणें, जमीन, मूंय, भूंय ह्या सारक्या कवितांनी सूक्ष्मताय आसा. ह्या कवितांचो नाळ जमनीकडेन लागींचो संबंद आशिल्ल्यान तातूंत मातयेचो कुरकुरीत आनी व्हांवपी उदकाचो आवाज येता. हिंदी अणकारांतय ह्यो सगळ्यो गोश्टी आयल्यात आनी ताका लागून हिंदी मोगींकूय तितलोच आनंद मेळटलो आनी कोंकणी कविते कडेन ते स्वताक जोडटले.
आदित्य सिनाय भांगी हे गोंय विद्यापिठांत हिंदीचे सहायक प्राध्यापक. युवा भाशाशास्त्रज्ञ आनी अणकारपी म्हणून तांची गोंयांत नामना आसा. हिंदी शुद्धलेखन, भाशाशास्त्र, व्याकरण ह्या विशयांचेर ताणीं आयज मेरेन गोंयांत सुमार 25 कार्यशाळा घेतल्यात. तशेंच प्रुडंट मिडिया, दूरदर्शन, गोमंतक टीव्हीचेर तांच्यो मुलाखती आसात. सोशल मिडिया आनी दिसाळ्यांनी लेखांतल्यान जायत्या समाजीक प्रस्नांचेर आवाज उठोवपाक ते सतत सक्रीय आसतात. स्वतंत्र अणकारपी म्हणून ताचें हें पयलेंच पुस्तक. राज भवनांत अणकारपाचें काम करत आशिल्ल्यान पयल्या पुस्तकाचें लोकार्पण राज्यपालांच्या हातान जावचें अशी तांची इत्सा आशिल्ली. तांचो हिंदी अणकार जायत्या नामनेच्या कवींक आवडला आनी ह्या अणकाराचेर जायत्या सुवातींनी चर्चा जाल्या. कविता अणकारप खूब कठीण पूण कविता अणकारपाक तांकां खूब आवडटा. जसो कवी परेश कामत हाणीं ह्या संग्रहांत स्वतंत्र भास आनी उतरांचो प्रयोग केला तसोच आदित्यान ह्या संग्रहांत नव्या भाशेचो प्रयोग केला. ते म्हणटात – जायत्यो कविता बसींत बसून अणकारल्यात. दरेक कवितेची जायते फावट तपासणी केल्या. शांत जाग्यार बसून, लीन जावन हांव अणकार करतालों. अणकाराक आठ म्हयने लागले आनी उरिल्ल्या हेर कामांक वट्ट चार वर्सां लागलीं. हिंदींत ‘ळ’ वापरिल्लें तशेंच गोंयचीं आडनांवां तशा तशींच दवरिल्लें घडये हें पयलें पुस्तक आसूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
