भांगरभूंय | प्रतिनिधी
म्हजो इश्ट ज्ञानेश वेवसायान एक शिक्षक आपल्या सगल्या इश्टांक सदांच सांगत आसता. ‘स्वताक वेळ दियात’ सुटये दिसा तरी घराब्या सांगाताक भायर पासय मारून येयात. देवळांत नाजाल्यार प्रायेर वचात मन शांत करून परत येयात. स्वताक असो वेळ दिवप गरजेचो जावन आसा. खरें ताचे, मनशान आपले खातीर दिसातलीं कांय मिणटां तरी सुगूर करून दवरूंक जाय. दीसभर तकली सकयल घालून कसल्या ना कसल्या कामांत आपल्याक गुथूंन दवरप समा न्हय. आयची महिला जी नोकरी, वेवसाय करून संवसार सांबाळटा तिची कितली धांवपळ जाता आसतली हाची कल्पना केल्यारच जीव गळ्या कडेन आयिल्ले वरी दिसता. तेचपरी एक मद्यम पिरायेचो दादलो मनीस आनी तरणाटी पिळगी लेगीत आपल्या कसल्या ना कसल्या व्यापात व्यस्त आशिल्ल्यान प्रस्न उप्रासता आयज कोणाक वेळ आसा व्हय? हांव तर म्हणन स्वता खातीर कोणाक वेळ ना हें निव्वळ सत. कामाच्या व्यापात कोणाक ताचे पडून वचूंक ना. ना म्हूण कोण ह्या विशयाचेर भासाभास करूंक पळयना. मनीस जेन्ना हांतरुणार पडटा वा कसल्या ना कसल्या संकश्टांत सांपडटा तेन्ना हें सत आमकां कळूंक लागता. अशा वेळार बरोच कळाव जाल्लो आसता. ही गजाल मतींत दवरून हांव सगल्यांक सांगपाक सोदतां मात्शे रावया, विसव घेवया आनी मुखार या. कारण ह्या संवसारांत आमी कोणांक भिना जाल्यार लेगीत वेळा काळाक भियेवचे पडटले तो केन्ना कोणाचो घात घेत हें कोण सांगपाक शकना.
संवसारभर नामनेचे मानसोपचार तज्ञ कार्ल जंग म्हणटाले Those who look outward – Dream,
Those who look inward – Become Aware.
वयर दिल्ल्या दोन वाक्यांचो वेगळो वेगळो अर्थ लावं येत. भायलो सोबीत सुंदर संवसार पळोवपी मनशांक ते सपनां पळयात म्हूण सुचयताले. कारण मनीस जेन्ना बरी वस्त पळयता तेन्ना ती ताका जाय जाय शी दिसता आनी तो जेन्ना बरी गजाल आयकता ती गजाल ताका आपणावची शी दिसता. हें सत, अशें मानलें तर कितेंय मेळयतलो जाल्यार मनशाक सपनां पळोवचीं पडटा मागीर तीं सपनां पुराय करपाक हूम गळोवची पडटा. देखून घडये कार्ल जंग मनशांक सपनां पळोवंक सुचयता. आमचे आदले राष्ट्रपती स. अब्दुल कलाम लेगीत तरणाट्यांक सांगताले, सपनां पळयात आनी ती पुराय करचे खातीर वावराक लागात म्हण. तशातलीच हीय गजाल जावन आसा. खरें म्हणशात तर मनशाची पुराय जीण विद्यार्थ्यां वरी जावन आसा. दरेक दीस आमकां कसली ना कसली शिकवण दिता पूण मनशांक ती शिकवण घेवंक कळूंक नाका?
आयज आमी जें अणभवतात ते प्रमाण बऱ्याचेर वायटाचो शेक चलिल्लो दिसता जाका लागून घडटाय वेगळेंच कितें. मागीर पुराय समाजाक ताचे बरे वायट परिणाम भोगचे पडटा. म्हूण कार्ल जंग आमकां देख दिवन सुचयतात आपले भितर पळोवन जागृत जायात. जी सोबीत सुंदर गजाल हेरां भितर आसा आनीक आपले भितर ना जाल्यार ती, आपले भितर कित्याक येवंक ना हाचेर विचार करात. हे प्रस्न स्वताक विचारून ते सोडोवपाचो यत्न केल्यार वाट मेळटलीच हातूंत दुबाव ना. परिपूर्णताय न्हय जाल्यार पूर्णताय येवचे खातीर प्रामाणीक प्रयत्न दरेकल्यान करूंकच जाय. देवान इतली तांक सगल्यांक दिल्ली आसा. अशें तांचे मत जावन आशिल्लें. कार्ल जंग म्हणटा ते प्रमाण मनशांत आशिल्ले गूण आनीक प्रतिभा हांच्या बळार मनीस हिमालयाचे तेंगशेर वचपाचो आपलो हावेस पुराय करूंक शकता.
मनशां भितर संपूर्णताय येवप म्हणल्यार कितें ? असो जेन्ना एखाद्रो तरणाटो म्हाका प्रस्न करता तेन्ना म्हजी जाप एकदम सोंपी आसता. ज्या मनशा लागीं आपले दोश, आपलें उणेंपण स्विकार करपाची तांक आनी ते दोश पयसावची दानत आयिल्ली आसता त्या मनशां भितर संपूर्णताय आयल्या अशें हांव मानता. आनी म्हणून हांव ह्या तरणाट्यांक समजायतां, तुमच्यो कमजोरी खंयच्यो त्यो वळखात आनी त्यो पयसावचो यत्न करशात तर एक दीस जैत तुमचेंच आसतलें. म्हाका दिसता डॉ. अब्दुल कलाम आनीक कार्ल जंग सारकिल्ल्या विद्वानांनी हेंच केलां. देखून ते संवसारार नामना जोडूंक पावले. अशा मनशांच्यो देखी दिवन आमी तरणाट्यांक प्रेरीत करपाचो यत्न केल्यार कशें कितें ? तांच्या मनांतल्यो शंका पयस करप आमची जापसालदारकी जावन आसा. पयले सुवातेर तांकां समजावचें पडटलें ते म्हणल्यार दरेक मनशा भितर परिपूर्णताय आसपाकच जाय अशें ना. जिणेचो तोल सांबाळूंक कळ्ळ्यार पुरो. जिणे तागडी केन्ना उजव्यान तर केन्ना दव्यान लकपाक उपकारना. तिचो कांटो सरळ उरपाक जाय तेन्नाच आमी म्हणपाक शकतात जीण सरळ मार्गान वता म्हूण. केन्ना केन्ना आमची जीण हाता भायर वता अशें दिसता तरिपूण आमी ती सांवरून घेता काय ना. हे परिस्थितींत मनीस पूर्णतायेचें दर्शन दिवंक सफळ जाल्लो आसता.
कार्ल जंग हो एक नामनेचो मानसोपचारतज्ञ तो वीस परस चड पुस्तकांचो लेखक जावन आसा. तो एक बरे पैकीं संवाद सादपी तशेंच शिक्षणीक तज्ञय आशिल्लो. तांचो विश्लेशणात्मक मानसशास्त्राचो सिध्दांत व्यक्तीत्वाचे पुराय जिणे प्रक्रियेचेर लक्ष केंद्रीत करता. जंय मनीस जाणीवपूर्वक अविस्वास आसून लेगीत एकठांय येतात. आत्मसाक्षात्कार मेळोवन घेवपा खातीर व्यक्तीमत्वाच्या वेगळ्या वेगळ्या आंगांचें एकीकरण करपाचेर लेगीत हो सिद्धांत भर दिता. तातूंत समाजीक आनी वैयक्तीक गती विज्ञानाचोय आस्पाव केल्लो पळोवंक मेळटा. खरें म्हणशात तर दरेकल्यान आपले भितर आशिल्लो अहंकार पयस करून हेरां खातीर प्रेरणादायी जीण जगपाचो यत्न करूंक जाय. जिणे सिध्दांत वेगळे वेगळे पूण दरेक मनशान आपले भितर परिपूर्णताय न्हय तर पूर्णताय येवंक वावरूंकच जाय.
एच. मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
