भांगरभूंय | प्रतिनिधी
भावंडांनो,
मनीस जल्माक आयल्या उपरांत तीन अवस्थेंतल्यान तो आपणाल्या जिविताची वाट चलता. खंयची जाणात? भुरगेंपण, तरनाटेपण आनी जाण्टेंपण. पुराय भुरगेंपण आनी अर्दें तरनाटेपण मनीस विद्यार्थी दशेंत घालयता. आपले जिणेक उजू मार्ग मेळचो ह्या हेतान तो आपली सुमार २०-२१ वर्सां विद्या मेळेवपांतूच सारता.
ही विद्या म्हळ्यारच शिक्षण आपल्या पदरांत मेळयतना तांच्या आयुश्यांत कांय वेळार निर्शेणी वांट्याक येता. निर्शेणे वांगडा झुजतना विद्यार्थ्यांक खुबूच त्रास जाता. तेदेवेळार तो देवाची प्रार्थना करीत रावता. अशें घडप साहजीक भांवडांनो. मनशाच्या मनांत भंय निर्माण जालो की ताका देवाची याद जाता. भंयांतल्यान कुशीक सरपा खातीर ते देवाची प्रार्थना करतात. हें हांव कित्याक सांगतां जाणां? हांवें म्हज्या दोळ्यानीं पळयल्यात तुमच्यांतल्या कांय भावंडांक.. परतून परतून देवळांत वतात तीं. हें कित्याक घडटा जाणा?.. कारण, तुमच्यांतल्या कांय भावंडांच्या वांट्याक अपेस आयलां. तातूंतल्यान निर्शेणी आयल्या. इतलेंय घडलां तें तुमी तुमच्या कर्तुबांचो विचार करूंक नाशिल्ल्यान. भावंडांनो तुमी जें शेणयलां, जें मेळोवंक तुमी उणी पडल्यांत तें मेळोवपाचो परतून यत्न करी नासतना देवाच्या भावार्थान, ताका होरावंक लागल्यांत. तो तुमकां अपेसांतल्यान तारतलो हे आशेन.. भावंडांनो, तुमी देवाक भजूंकच जाय. पुणून एक मतींत दवरात.. देव हो फकत देवळांतूच रावता अशें ना. म्हजें आयकयात,.. देव हो तुमच्या दर एकल्याच्या कर्तुबांत आसता. तो.. तुमच्या यत्नांनी लिपिल्लो आसा. भावंडांनो, कसलींय अपेसा, इत्सा, हावेस बाळगीतना तुमच्या कर्तुबांचो लगाम तांकां घालूंक जाय. तो जर नासत जाल्यार तुमच्या वांट्याक अपेसाभंग येता. दुख अणभवपाक येता. देखून देव हो दरेकल्याच्या कर्तुबांनी लिपिल्लो आसता हाचें भान दवरून नेमान यत्न करूंक जाय. तुमी यत्न करीत रावल्यार देव मुजरत तुमकां येस दितलो हें उल्हासभाईचें उतर.
आतां, ह्या सप्तका सावन तुमच्यो परिक्षा सुरू जाल्यात न्हय? म्हण्टकच वेळ आयला तुमच्या अभ्यासाची परवड करचेलो. आतां आनीक हांगा-थंय भोंवून वेळ वगडांव नाकात. थोडेच दीस तुमी खेळा कडेन, भोंवपा कडेन वा टिव्ही, मोबायल, रेडिओ कडेन ‘गट्टी फू’ करात. परिक्षा सोंपले उपरांत तुमकां जाय तितलो त्या साधनांचो लाव घेयात. तुमकां कोण आडावचे नात.
भावंडांनो, तुमी अपुरबायेचीं भावंडां जाल्ल्यान, तुमच्या वांट्याक अपेस आयिल्लें पळोवपाक म्हाका आवडचेंना. देखून सांगतां. भावंडानो ह्या निमणे परिक्षेंत येस जोडपा खातीर तुमचे यत्न नेमान चालू दवरात.. तुमच्या यत्नांक भिवन येसाक तुमच्या फाटल्यान धांवत येवं दी. येतलेंच तें. ते खातीर हांव तुमकां बरी भलायकी आवंडेतां. काळजी घेयात आमी परिक्षेक बरेतरेन फुडो करात…. तुमकां उपाट येस आंवडेतां. तुमचोच..
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
