परतीच्या पावसाचो सत्तरी म्हालाक फटको
भांगरभूंय | प्रतिनिधी
वाळपय : फाटल्या तीन दिसां सावन परतीच्या पावसाक सुरवात जाल्या. हो पावस वांगड जोगलां, गडगड आनी वारें घेवन येता. हाका लागून ताचो गोंयच्या विवीध वाठारांनी बरोच फटको बसला. रस्त्यांचेर, घरांचेर झाडां कोसळिल्ल्यान लुकसाणूय सोंसचें पडलें. ह्या पावसाचो सगळ्यांत व्हड फटको बसलो तो सत्तरी म्हालाक.
गुळेली ग्रामपंचायतीच्या धामसे ह्या गांवच्या नारायण सूर्या वाघ हांच्या घराचें तशेंच हेर मालमत्तेचें लुकसाण जालां. पावसाक लागून तांच्या सर्व्हे क्रमांक ११/२६ ह्या घराचेर झाड पडलें. घराक लायटीची पुरवण करपी दोन खांबेय कोसळिल्ल्याचीं म्हायती ह्या कुटुंबान दिली.
वार्याक लागून नायक हांचे बागायतींतल्या केळम्यां सयत सुपारेच्या झाडांचेंय लुकसाण जालें. हांगा सारको रस्तोय ना. ताका लागून हांगा पडिल्ले लायटीचे खांबे दुरुस्त करपाक बरेच त्रास सोंसचे पडटात. लायट नाशिल्ल्यान नायक कुटुंबाक काळखांत दीस सारचे पडटात.
सत्तरीच्या उपजिल्लोधिकार्यांनी भेट दिवन जाल्ल्या लुकसाणाची पळोवणी करची, अशी मागणी नारायण नायक आनी कुटुंबीयांनी पत्र बरोवन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
