भांगरभूंय | प्रतिनिधी
जाणांत तुमीं?
4 ऑगस्ट. नामनेचे गायक, अभिनेते किशोरकुमार (गांगुली) हांचो वाडदीस. ते निमतान तांचो एक किस्सो वाचूंया. जायत्या वेळार आमी खर्चाचें बजेट थारायतात, पूण मना सारक्यो गजाली जायनात. खर्च वाडटा. निर्मातो- दिग्दर्शक जे. ओम प्रकाश 1974 वर्सा एक सिनेमा काडटाले. ताचें नांव, ‘आप की कसम’. राजेश खन्ना, मुमताज हिरो- हिरोयन. सिनेमा बरोच गाजलो. भितरलीं सवूय पदां सुपरहिट जालीं. हातूंतलें ‘जय जय शिवशंकर’ हें पद आर. डी. बर्मन बसयताले. कोरसा खातीर चड वाद्यां, गायक घेवचे पडले. बजेट आशिल्लें 25 हजार, तें वाडून जालें 50 हजार. निर्माते ओमप्रकाश जाले बेजार. जावपाचेच. स्टुडियोंत परत परत पयशे मोडचे पडले….हेंच झरयत रावले. गायक किशोर कुमारान हें हय न्हयशें आयकल्लें. तांणी दुसरे दीस आरडींक विचारलें. तांणी सगलें सांगलें, ‘किशोर, आसूं रे. सदचेंच तें. तूं चड लक्ष दिवं नाका. पदाचेर लक्ष दी’.
आनंद बक्षी हांणी पद बरयिल्लें. भांग पियेवन हिरो, हिरोयन गायतात, अशें हें गीत. किशोर कुमार फकांडेर मनीस. रॅकाॅर्डिंग सुरू जालें, लता मंगेशकार आनी किशोर कुमार गायताले. पद सोंपतना खूब वाद्यां वाजोवपाचीं आनी ‘ही.. ही… ही, हू.. हू… हा.. हा’ अशें हांसत पद सोंपोवपाचें. येसाय मारतना अशेंच करताले. पूण, किशोरकुमारान निमण्या रेकाॅर्डिंगा वेळार हांसता हांसतना कांय ओळी म्हणल्यो. त्यो तश्योच रेकाॅर्डूय जाल्यो. सगळे वाजोवपी, आरडी, लता मंगेशकार… कोणाकूच खीणभर कितें जालां तें कळ्ळें ना. कळ्ळें तेन्ना तांच्यो हांसून मुड्ड्यो पडल्यो. निर्माते ओमप्रकाशाकूय कळलां आसतलें. पूण, तो मेरेन सिनेमा रिलीज जाल्लो.
त्यो ओळी आशिल्ल्यो, ‘अरे बजाव रे बजाव, ईमानदारी से बजाव, अरे बजाओ बेटा, पचास हजार खर्चा कर दिए’ (आरे, वाजयात रे वाजयात, सारकें वाजयात, पापयांनो, पन्नास हजार रुपया मोडल्यात मरे.) पदाच्या शेवटाक हीं उतरां आयकूपाक मेळटात. तीं आनंद बक्षीन बरोवंक नात. ऐन वेळार किशोर कुमारान घेतिल्लें तें एडिशन.
– डी. महेश
व्हिडियो लिंक – युट्यूबाच्या बरेपणान
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
