भांगरभूंय | प्रतिनिधी
आदिवासी विद्यार्थ्यांच्या संमेलनांत मुख्यमंत्री डॉ. प्रमोद सावंत हांची हमी
मडगांव: बरे गूण मेळोवन जो विद्यार्थी शिक्षण घेवपाक पळयता. ताका प्रवेश मेळ्ळो पूण पयशाच्या उणावाक लागून ताचें शिक्षण उरता अशें जावचें ना. भाजप सरकाराच्या काळांत खंयच्याय जातीधर्माचो विद्यार्थी शिक्षणाची फी भरूंक जमची ना अशें म्हणून शिक्षणा पसून वंचीत उरचो ना ही आपली हमी आसा अशें उलोवप मुख्यमंत्री डॉ. प्रमोद सावंत हांणी केलें.
रवींद्र भवन मडगांवच्या सभाघरांत सव्या आदिवासी विद्यार्थी संमेलनाचें आयोजन केल्लें. ह्या वेळार मुख्यमंत्री डॉ. प्रमोद सावंत, मंत्री आलेक्स सिक्वेरा, मंत्री सुभाष फळदेसाय, आमदार उल्हास तुयेंकार, उटाचे अध्यक्ष प्रकाश वेळीप, एसटीएसी आयोगाचे दीपक करमळकार, सचीव ज्येष्ठा जाधव, प्रणय वैद्य बी मानेस्त हाजीर आशिल्ले.
ह्या वेळार आदिवासी समाजांतल्या गुणेस्त विद्यार्थ्यां सयत समाजाच्या हिता खातीर कार्य केल्ल्यांचो भोवमान केलो.
मुख्यमंत्र्यांनी मुखार उलयतना म्हणलें, आदिवासी खात्या वतीन दरवर्सा आदिवासी विद्यार्थी संमेलनाचें आयोजन करतात आनी गुणेस्तांचो भोवमान करतात. गोंयांत शिक्षणाच्याे विवीध संदी उपलब्ध आसात. राज्य सरकारान राज्यांत शिक्षणा खातीर विवीध म्हाविद्यालयांची स्थापणूक केल्या. तशेंच एससीएसटी, ओबीसी, अर्थीक मार्गास वर्गांतल्या भुरग्यांक शिक्षणा खातीर शिक्षणीक रीण उण्या कळंतरान उपलब्ध केलां. शिक्षणा जो कितें आदार जाय तो दिवपाक गोंय सरकार तयार आसा. विद्यार्थ्यांनी सरकारा कडल्यान शिक्षणा खातीर आशिल्ल्यो सगल्यो येवजण्यो, शिश्यवृत्ती हांची म्हायती घेवची. आवडीच्या मळार करियर करपाची संद भुरग्यांक आसा. ती संद विद्यार्थ्यांनी घेवची. ते खातीर शिक्षकांनी विद्यार्थ्यांक गरजेचें तें मार्गदर्शन करपाची गरज आसा. विद्यार्थ्यां कडल्यानूय करियरा खातीरच्यो संदी सोदच्यो अशें तांणी म्हणलें.
मंत्री सुभाष फळदेसाय हांणी म्हणलें, विद्यार्थ्यांनी बरे आदर्श दोळ्या मुखार दवरून करियर घडोवचें. बांदार उबे रावन राजकारण्यांक उलोवपाचे बदला सुशिक्षीत आनी सुसंस्कृत मनशांनी राजकारणांत येवन बदल घडोवपाची गरज आसा.
संचालक दशरथ रेडकार हांणी सांगलें की, आदिवासी संचालनालया कडल्यान समाजाच्या विकासा खातीर काम करतात. विवीध येवजण्यो ह्या खात्या वतीन विद्यार्थ्यां खातीर हाडल्यात. आदिवासी समाजांतल्या विद्यार्थ्यां खातीर हॉस्टेला खातीरचे निधीत वाड केल्या. विद्यार्थ्यांक शिश्यवृत्ती दिवपा खातीर येवजण्यो काडिल्ल्याचें तांणी सांगलें.
ह्या वेळार मंत्री आलेक्स सिक्वेरा, प्रकाश वेळीप, उल्हास तुयेंकार हांचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
